入門機勁Games出籠哥斯拉搞破壞
作為Symbian手機的始祖，Nokia近期推出多款入門機如C5-03、C3-00、X3-02等，而Ovi Store亦相應推出新Apps畀一眾S60、S40平台手機下載，當中最受歡迎自然係一眾勁Games，以後唔單止貴價智能手機先有好玩遊戲，連平機用家都可以一齊玩！
撰文：林子聰 攝影：梁偉德 模特兒：Cow Cow（大紅大紫）
《Demo Fishing:Off the Hook》亞馬遜河釣魚
雖然釣魚係訓練耐性的好方法，但於烈日當空下垂釣確實辛苦。如果你係釣魚迷，不妨試玩《Demo Fishing : Off the Hook》，只要用手指一篤，調校力度和角度就搞掂，最特別係有唔同場景畀你揀，連大堡礁、亞馬遜河都有，以後唔使日曬雨淋都可以釣魚喇！
《Animal Catapult Lite》畫彈床救動物
坊間謠傳跳彈床可以增高、減肥，成功與否就無從驗證，但原來彈床可用來救小動物！講緊的是《Animal Catapult Lite》，玩家要畫彈床幫動物跳過對面懸崖，幾考大家反應。最特別係可以用藍芽進行雙打，約埋朋友一齊玩就最過癮啦！
《Garfield's Day Out Lite》加菲貓冒險
加菲貓漫畫已超過30年歷史，相信大家對呢隻肥貓耳熟能詳。不過今次《Garfield's Day Out Lite》佢就一改懶脾性，四圍郁搵食物。玩法屬橫向冒險遊戲，愈拎得多食物就愈高分，如果見到敵人，加菲貓仲可以飛報紙作攻擊，非常可愛。
《Demo Mini Golf 99 Holes》過癮障礙物
如各位想試打高爾夫球，一定要玩呢隻《Demo Mini Golf 99 Holes》。玩法好簡單，只要控制揮桿力度和角度就得，不過每關都會有唔同的障礙物、傾斜場地等考驗你身手，都幾講策略。
《Bruce Lee - Iron Fist》李小龍打餐飽
李小龍的武打形象深入民心，如果想見識一代巨星的功夫，就要單撈《Bruce Lee - Iron Fist》。玩家可控制李小龍以臥底身份參加「鐵拳」比賽，打倒所有歹徒。雖然只係一隻格鬥遊戲，但都有直拳、踢腿等招數，畀大家回味一番！
《Godzilla - Monster Mayhem Lite》化身哥斯拉
電影中哥斯拉令人聞風喪膽，《Godzilla - Monster Mayhem Lite》遊戲反而畀大家扮演呢隻怪獸，控制佢四出破壞，包括徒步摧毀大廈，或者口噴火燄等。此外，連經典王者基多拉、魔斯拉都有，啱晒想重溫昔日經典的朋友。
同場推介:《topApps》分類清晰
咁多Apps和遊戲齋睇都已經眼花，好彩Ovi Store近期推出《topApps》分類軟件，備有商店十大、香港Apps等，以後搵工具就更加易啦！