某個晚上某個巴士站，身旁一對中年男女的對話充滿怨懟，負能量從他們身邊滲出直撲過來，我忍不住轉頭看看是何方人馬，他們頓是呆了半晌，好像不理解為何晚上11時46分被某位略胖的陌生男子以凌厲眼神「斜Bear」。
這雙中坑男女的對話，大概是：「今晚的酒席真係好鬼難食！」「咪係，坐得又逼！」「上次阿乜嬸個乜女出嫁，個餐仲衰，又冇魚翅又冇乜！」「咪係，食到成肚氣，擺酒擺得咁鬼孤寒！」他們說得愈來愈大聲，愈來愈理直氣壯，完全忘記了出席婚宴是向主人家祝福──是的，不少仁兄仁姐，去婚宴是十分志在那碗像漿糊的魚翅、打上厚厚獻汁的鮑片，和最後上枱的一盤橙，得不到手，會覺得被虧欠，怨足一世啊。
人生旅途上，就算我們有幾小心，都總會「遇人不淑」，交上一些會讓你後悔的人。一次婚禮請飲，像一回半生盤點，讓你清算一下自己的關係帳目，甚麼人為你奔波連場，甚麼人無動於中，甚麼人只為你添麻煩，你會看得一清二楚。
朋友於早前舉行婚禮，最大特色，是參與婚禮製作的班底，包括兩間PR公司、四位專業攝影師、兩位星級化妝師、一隊樂隊連歌手、一位鋼琴演奏者，全是由朋友組成，大家都盡力為兩位新人服務，亦趁着一次婚禮跟朋友敍舊玩玩，場面溫馨兼且快樂。婚宴成敗，不在魚翅，在人緣。
旅遊飲食寫作人