玩具達人1,000件珍藏換車咁換

有緣可割愛

「我好熱愛玩具，但係我玩玩具就好似玩車一樣，當有新款出嗰陣，我願意放咗舊嗰部再換新嘅，咁算唔算我唔鍾意車呢？」阿Mac坦言自己收藏玩具最重要係自得其樂，唔會流於形式，如果買返屋企包實晒收藏，就感受唔到玩具嘅樂趣。

阿Mac收集咗唔少Popy超合金同大膠公仔，礙於空間有限好多都擺放於店舖，巡視業務時順手把玩一番。小記見過部分珍品竟然貼上價錢牌，阿Mac話如果有緣人想要，佢毫不介意割愛，玩具係要同人分享咁話！

阿Mac鍾情電單車，仲整咗唔少幪面超人頭盔。	Mac訂造咗個篋收藏「拉打W」手指。呢套嘢街賣成四五千蚊！	Kubrick初號機初模，並唔係街邊見到嘅發售品，相當珍貴。
Popy超合金嘅太空保衞者，留有阿Mac對父親嘅感情。	89年新一號公仔，背面入電池識大叫「變身」，當年要用1/3人工先買到。	高達08小隊陀錶，限量產品。阿Mac特登放咗一對仔女嘅相入去。

投射父子情

咁有冇玩具係幾多錢都唔賣？阿Mac遲疑了一會，話唯一可能係「太空保衞者」。原來阿Mac童年時與爸爸的關係比較疏離，「當時只知道老竇係一個忙於工作嘅商人。」後來爸爸去世，阿Mac從遺物中發現原來爸爸曾經係國民黨將軍！「太空保衞者故事入面，主角嘅爸爸亦係將軍，失咗憶唔知主角係自己個仔，直到相認之日已是爸爸戰死之時。」就係呢份感同身受嘅心情，阿Mac對呢款玩具特別有感情。

呢個係飾演Chewbacca嘅Peter Mayhew真手印，手掌大到成個巨人咁！

83年出品《武士復仇》玩具，天行者同黑武士都係新品未開封。

多元化發展

對玩具有認識嘅朋友一定知道阿Mac係Star Wars玩具發行商。「可能做星戰玩具，搞到自己都鍾意埋一份。」阿Mac特別鍾意83年的星戰玩具，皆因《武士復仇》最令佢着迷，而且阿Mac唔少珍藏都有演員親筆簽名，絕對價值連城！「做咗Star Wars咁耐，賺嘅錢足以三餐無憂，但係難有突破，曾經諗過收山。」阿Mac坦言有諗過唔做星戰，響工作上搵新挑戰，不過為咗班員工，冇理由結束生意，所以阿Mac最後選擇咗平行進口其他玩具，實行多元化發展。

合和Toys Party睇珍藏

想唔想睇阿Mac珍藏之餘，又可一家人共享玩具樂趣？小記有個好介紹，於明天開始一連兩日（12月4至5日），上午10時至下午6時，在灣仔合和中心廣場將舉行Toys Party玩具展。到時除了會有1:1 Figure、穿着幪面超人同高達角色嘅Cosplayer同大家合照外，阿Mac仲會擺出兩櫃珍藏，等大家緬懷一番。唔使錢有Show睇，最啱一家大細玩餐飽。

網址：http://www.qre.com.hk

阿Mac Profile

玩具達人

玩具年資：20年

職業：縱橫行玩具老闆

玩具數量：約1,000件

主要珍藏：星球大戰、幪面超人

最貴玩具：一對2呎長Star Wars激光劍，全球只有10對，估值超過100,000港元

網址：http://www.sith.hk

撰文：廖俊斌

攝影：蘇榮基