台北花博人間昆蟲記

特派記者：林登麗 鳴謝：台灣觀光協會、中華航空

睇花博　人龍打蛇餅

上海世博曲終人散，全世界的焦點都轉到於11月6日開幕的台北花博上。花博在台北巿圓山公園、美術公園、新生公園及大佳河濱公園4個相連區塊上演，加起來差不多有92個足球場咁大，一日冇可能行得晒。

花博6大吉祥物公仔，包括5位花精靈及種子寶寶，各NT$390（約HK$98）。

流行館Must Buy Items，五月天設計花博Tee及群星花博紀念專輯，NT$590（約HK$148）。

大家要變身昆蟲前，第一樣要做嘅就是排隊，事關園內10數個展館，人龍「打晒蛇餅」，當中夢想館、真相館及故事館等5個展館，你要晨早排隊拎預約券，一人一張，派完即止。通常頭位要晨早7點開始排，排到9時派飛，唔使40分鐘數千張飛就派晒。攞唔到飛，明天請早。芸芸派飛展館當中，坐落於新生公園區內的夢想館，每日僅派3,705張飛，依然人氣最爆，因為它是大家變身昆蟲地方。

流行館場館限定膠樽枱燈，NT$690（約HK$173）。	爭艷館內得獎最多的是來自美國夏威夷的「伊甸園」作品。展品上用了很多來自亞馬遜河流域的罕見藍色電子蝴蝶標本作布置。	我係韓國嘅高麗人參，明年花博（在忠清南道舉行），大家嚟韓國探我啦。（設計對白）

夢想館　讓你7步成蟲

夢想館實情係高科技數碼互動展館，大家可透過聲控、觸控感應及即時互動科技，展開一次感官旅程。館內大廳天花有朵巨型機械花，四周是由近千片呈葉子形的超薄型軟性揚聲器，當機械花聽到葉子發出大自然天籟之聲，便會隨之舞動，大廳內的燈光，也會隨着24小時天色的光暗而產生變化。光影聲色交織，令參觀者無不目瞪口呆。

來自加拿大Abbotsford無土園藝機械人，好似變形金剛的博派戰士喎。	情侶孖住入花海。	睇住自己7步成「蟲」，都幾過癮！

大家睇完記得攞隻智慧夢想手環，戴着它，便會在場內感應你的一切行動。而行過巨型投射銀幕，你我他的身影都會變成蝴蝶或蜜蜂，勁得意。另外，大家可於花瓣迷宮內穿梭，拍打雄蕊，試吓幫花兒交配，體驗生命孕育的過程。臨走前你仲會飛過機械花海，將夢想之花帶到這個世界。現場所見，無論3歲到80歲的參觀者，無一不被感動，難怪人人爭住體驗啦。

這片像會呼吸般電子花海，人人睇完都說：「超棒」。	美少女導賞員手中拿着的，就係每日限派250個的紀念膠樽瓶喇！	夢想館的360゜度環形劇場，可透過讀取大家的呼吸和心跳，然後與螢幕產生互動，最後爆出燦爛的煙花。

小膠樽　砌出環保夢

即使攞唔到飛入心儀展館，另外7個毋須憑券入場的展館——包括圓山公園區的流行館——遠東環生方舟和爭艷館，碰碰運氣。好運的話，排15分鐘便可入場。爭艷館是以「競花藝術」為主題之國際室內花藝花卉及園藝競賽展館，16個不同的國際花藝競賽輪流上演。到訪當日正值「全球花之饗宴」，多國園藝攜手打造出靚靚花世界。

流行館——遠東環生方舟是第2個必睇展館。此館是全球第1幢由膠樽搭建的綠色建築，由超過152萬個回收膠樽砌成，聲稱可防水、防颱風、防地震；兼且囊括「全球首座最環保的可透光建築材料」在內的7個世界之最，認真有睇頭。這展館不用拎飛入場，但依然好多人排隊，事關該館每日的頭250位參觀者，可獲贈限量迷你版的起屋膠樽一個，出面冇得賣o架！

2010台北國際花卉博覽會

地 點：圓山公園、美術公園、新生公園及大佳河濱公園

日 期：即日起至2011年4月25日

開放時間：每日9:00am~10:00pm

門 票：1日NT$300（約HK$75）

3日NT$600（約HK$150）

網 址：www.2010taipeiexpo.tw

交 通：乘捷運淡水線至圓山站下車，步行約1分鐘。

遨遊備忘

簽證：持有特區護照或BNO，並於香港出生的香港居民，只需於出發前登入www.immigration.gov.tw，即可免費申請及辦理入出台證。（註：入出台證需分開列印，並一併帶到台灣。）

貨幣：HK$1約兌NT$3.9

天氣：11月氣溫約18℃~23℃

機票：即日起登入中華航空網站www.china-airlines.com/hk購買於12月31前出發（12月23至26日期間出發除外）之指定台北來回機票，2人同行票價$1,250起。憑出發日登機證，到香港機場F區華航詢問櫃枱，各可免費獲贈價值NT$300（約HK$75）之花博入場門票，數量有限，送完即止。