「芒亨」於PSP手提遊戲界闊別兩年，一眾粉絲望穿秋水終於等到《Monster Hunter Portable 3rd》推出。之前「單撈」咗體驗版嘅朋友，應該已經約定班Friend迎接後天（12月1日）嘅屠龍行動；就算冇試玩過都好，只要留意以下狩獵貼士，解溫泉任務、訓練艾路貓、組隊打雷狼龍，罕有裝備一樣手到拿來。
玩過「芒亨」都知獵人身邊有隻艾路貓，由打理農場到接Quest完全幫晒手。唔同以往冇衫着行行企企，今集艾路貓會同大家一樣武裝去打怪，只要將生產武裝後所剩餘嘅「端材」，拎到武器防具店就可幫隻貓裝身。除咗單拖行動可以帶最多2隻貓外，佢哋仲識自組4隻出去狩獵，幫大家收集素材添，想練勁啲隨行貓就記得努力建設農場，同增加訓練場畀佢哋做嘢。
「芒亨3rd」會有6個戰鬥場景，分別係孤島、沙原、雨林、凍土、火山同埋新增嘅溪流。心水清嘅朋友應該記得前3個響Wii版出現過，只是各個地形、連結路線同怪物分布均有所不同。至於Boss級魔物，最具代表性要數雷狼龍神王牙，備有雷光效果嘅衝撞攻擊外，一到月圓之夜身上鱗片仲識「爆Seed」放電，畀佢劈中隨時秒殺，記得組隊先好同佢開拖。
新作另一特點是集會所旁邊有埋露天浴場，浸吓溫泉便可提升體力和精力。玩家更可從掌櫃接到全新「溫泉任務」，幫手提升泉水質素；另外更有「飲品任務」畀大家挑戰，完成後可買到更多口味飲品，響戰場上大派用場。而「芒亨2G」玩家記得拎個Save檔案進入新作，咁就可追加4個特典，包括新隨行貓暖笠笠套裝、保暖小豬服、能僱用特別配信貓，及取得「2nd G狩獵之證」同獨特稱號。
類型：動作
開發：Capcom
平台：PSP
推出日期：12月1日
查詢電話：2366 1001
售價：$358
撰文：廖俊斌