P90w快打短訊 Zoey掃貨不掃興

行街Shopping係女人大事，莫講話無聊電話，就算男友打嚟，都務求9秒9內極速收線！唔想破壞Shopping雅興又想傳情達意？不如學陶喆緋聞女友岑潔儀（Zoey）話齋，幫對方出部Lenovo P90w啦！「部電話粉紅色本身已可愛到爆，最正係數字鍵可變身做QWERTY鍵盤，方便一邊喪打SMS一邊繼續Shopping。」男士們，聽到仲唔快啲入手！

打字咁方便，等我問吓Honey今晚食乜嘢先！（設計對白）

橫揭煲劇一流

女仔揀機十居其九睇外表，Lenovo P90w粉紅機身先天已吸引人，最重要係採用日系機慣常用嘅摺合設計，配以金屬外殼及銀色邊框，啱晒哈日女生！此外，日系機愛玩變形，呢方面佢都跟到足，屏幕除可向上翻起，在「2-way雙轉軸」結構下還可打橫揭開，這時手機就會變成座枱模式，畫面亦會自動轉橫，方便出街煲劇。為照顧一眾「失魂魚」，手機更承襲Lenovo ThinkPad的防滾架內櫳，當手機跌落地時會將壓力分散，減低Total Loss機會。

鉸位10萬次測試

港男愈來愈黏身，唔想Shopping時聽到奪命追魂Call，用SMS打發佢哋就至啱。呢方面P90w亦照顧到，在正常形態時，其鍵盤只能當作數字鍵使用；但當屏幕打橫揭開時，鍵盤本身具備的QWERTY功能便會被激活，這時英文字母便獨立成鍵，喪打SMS話咁易！廠商更表示，每部手機出廠前橫揭鉸位都經過10萬次開合測試，幾手多都唔怕！

售價︰$1,680

國產機必備雙卡插槽，惟留意只係雙卡單待，未夠全面。

內置320萬像素鏡頭，Snapshot剛好夠用。

即玩微博QQ

P90w還具備多種通訊方式，最大路有Twitter及QQ等；若嫌用唔慣，跟機還有個Nimbuzz程式，以一站式管理Facebook、Google Talk及MSN等社交帳號，傾偈毋須逐個程式開，方便直接！有見近年微博攻入香港，P90w亦引入微博網頁版，一個掣就可發表留言，最適合Zoey呢啲中港兩邊走嘅藝人，隨時跟家人好友報平安。制式方面，內地已有3G頻譜，因此P90w除支援GSM雙頻外，還對應3G及3.6Mbps HSDPA速度，上網自然比其他國產機快多多聲啦！

機面設有1吋小屏幕，可用來檢查時間及未讀短訊數量。	全機只有一個microUSB插頭，包辦充電、過相及接駁耳筒等功能。	放大圖片
放大圖片	撳個掣就入到網頁版微博，雖然介面唔算美觀，但登入及留言同樣方便。	Nimbuzz程式可綜合管理Facebook、MSN及Yahoo! Messenger等往來訊息。
內置QQ程式，可同內地網友交流Shopping心得。