Toughbook CF-31 三防踩唔爆

大家夠唔夠膽踩上自己部手提電腦呢？如果係Panasonic新推出嘅三防筆記簿Toughbook CF-31就唔同講法，體重約100磅嘅模特兒踩上去冇問題，就算發布會上有個體重達300磅嘅行家企上去都冇穿冇爛，足證這部13.1吋輕觸三防新機有幾強橫！

售價$39,500

特強防護性能

相比上代CF-30，新機CF-31進一步加強三防性能，經改良內部設計後，更通過嚴格要求的IP65國際防護標準，保證機身不會入塵，並且通過高速射水測試，在每分鐘12公升流量的噴水試驗中完全冇入水。另外CF-31還符合美國軍事標準US MIL STD 810G，從1.2米高處墜下，內部零件都絲毫無損；雖然官方沒提供機身可承受幾多重量的資料，但實試逾300磅踩上去都冇問題，配合高亮度背光LED觸控屏幕，足可應付極端工作環境如地盤、工場等需要。

升級Core i5搭載HDMI

作為一部近四皮嘢身價的手提電腦，硬件規格當然要追得上時代，CF-31已轉用現時主流的Core i5平台，比上代運算效能提升一倍有多，始終Toughbook用家並唔會經常轉款，新規格已能滿足兩、三年後的工作需要。由於三防性能是CF-31的首要考慮條件，機身設計都幾重型，重量達3.72kg，幸好機身同時附有手挽，可當作工具箱拎住周圍走。值得一提是新機已經加入HDMI端子，可輸出高清視像訊號；而且操作時間可達11.5小時，表現都幾理想。

CF-31通過嚴格防水測試，成支水倒落機面都唔怕。

機身預留光碟機和擴充插卡位，供用家升級選購。

同場加映 CF-C1三防Tablet

同場另一款為專業用家而設的Toughbook CF-C1明顯細幾個碼。新機採用12.1吋多點觸控扭芒，將屏幕180度扭轉便可變成Tablet電腦，做簡報就更方便。最吸引是機身重量只有1.49kg，卻同樣具備出色的三防功能，如備有防壓及防潑水設計的鍵盤、通過100kgf壓力及76cm下墜機身測試等，外出使用都唔怕撞爛。還追加Core i5平台及兩組電池，足夠使用10小時。