占星問卜 iPhone洩天機

卜卦、星相、算命、風水，自古皆有之，屬中國人的民間智慧。時至今日，想趨吉避凶、增運改勢，除咗去搵個真材實料嘅師傅，其實仲有方法，只需幾蚊美金喺iPhone裝幾個Apps就搞掂。雖然內容未必夠師傅講解咁詳細，但勝在Apps裝咗就一世跟住你，想「拜訪」幾多次都唔會再收你錢！

《鬼谷子算命》係一個免費程式，版面設計非常簡單，用家只需輸入自己嘅出生年、月、日、時，程式就會從命書中找出對應嘅命格，然後會顯示關於命格的詩詞和解說，大致描述此命格的一生經歷。最正係有埋改運錦囊，雖然頗為簡單，但作為免費參考也不錯。

售價：免費

蘇師傅成日都出書上電視，現在出埋iPhone App想偷師就更方便。《蘇民峰玄學錦囊——相掌篇》內容非常全面，包括有男女面相、掌紋分析，例如會講解點為之「夫妻相」，原來奸人、色狼、小人全部有樣睇，甚至暗瘡生響邊度都暗藏玄機，仲教埋你用染髮、戴眼鏡等化煞避凶，題材貼身有趣。

售價：4.99美元（折約港幣$38.9）

香港地少人多，屋企間隔唔易改動，想睇樓時買間風水屋，《全屋吉位大搜查》或者幫到手，用家可選擇七運或八運、輸入屋主時辰八字，再用電子風水羅盤，根據度數顯示八方、飛星局和吉位等，仲可以記錄多間屋的資料，買樓時靠佢幫手睇吓間屋就更加安心。

售價：0.99美元（折約港幣$7.7）

人有霎時禍福，遇到人生交叉點、突然而來的機會等，有時候真係唔知搵邊個幫手。《易經卜卦》沿用「金錢卦」設計，只需誠心暗唸問題，跟着指示搖手機6次便可得出卦象，然後選擇問事範圍，如未來事業、戀愛結果、家庭相處、考試表現、健康狀況等，以簡單方法紓解用家困惑。

售價：4.99美元

（折約港幣$38.9）

西方星相在香港都很受歡迎，《mPro星座》雖然只推出咗一陣子，但由於介面簡潔易用和免費任用，唔少人都拿來「看門口」。程式除了可睇到當日的星座運程，仲可查閱整體運勢、人緣財運、性格分析等，了解有甚麼地方需要改善，至於信幾多成就要由用家自行判斷。

售價：免費

《Tarot塔羅牌》有免費和收費版本，當然後者的內容豐富詳盡好多，集16種牌陣占卜方法於一身。用家只需按個人喜好選擇牌陣，便有動畫配合洗牌、切牌等動作，開牌後每張牌都會顯示相關的斷語，解讀出潛意識給你的暗示，讓各位重新思考前路去向。

售價：2.99美元（折約港幣$23.3）

撰文：陳若冰