周柏豪貪靚犀利哥
25歲，理應還是甚麼也暢所欲言的年紀，但跟25歲的周柏豪談新鮮緋聞女友何超雲，他即煞有介事，原因是不想人家以為他愛攀權貴。或許小時捱過窮過，磨練到今日懂珍惜不靠人有骨氣的性格，所以連着衫也一樣，不愛大刺刺浮誇驚死冇人見到冇人知，所以黑灰兩色是周柏豪的保險色，就算要玩誇張也誓死不離黑灰兩色，喜歡低調地浮誇，同時更有個人癖好，無論踏破天涯海角，腳上那對一定是包踭鞋，這才有安全感。
「從來冇當自己係潮人，我係好喜歡靚嘢，貪靚啫！有啲人對着衫係冇所謂，但我一來係model出身，二來我本身嘅興趣都係fashion，係對顏色或cutting有要求，但着咗上身，就唔會好姿整話怕污糟怕皺。好似余文樂咁可能有潔癖，佢返屋企會好細心抹乾淨鞋底，但我踢花踢污糟都唔會理。可能我喜歡着得似乞兒啲，長『賴賴』咁嗰類最啱，成日覺得太斯文太乾淨就等於造作，睇落去亂啲、冇咁乾淨，反而有血有肉啲。」咦？聽落有啲似曾經紅爆一時嘅犀利哥喎！
「初入行時，好喜歡照鏡，凡見到可以反光嘅物體都會照，行過見到架車嘅玻璃窗都照一餐，成日畀公司話。依家我真係戒照鏡，因為學識相信身邊嘅同事，如果我頭髮或個樣唔得，佢哋會話我聽。」
為儲錢黐飲黐食
「幾時先知自己貪靚？應該係青春期開始，但當時屋企生意失敗，家境唔好，連媽咪要攞999蚊出嚟續個牌都有問題，所以我當時係冇零用錢。當時好想買對Adidas波鞋，為咗儲錢，就同啲女同學一齊食飯，佢哋食唔晒就我食埋，又或者打完波人人買汽水飲，我就會黐幾啖嚟飲，返學放學唔搭車情願行路行半個鐘，所以媽咪當時鬧我打波先至成日行蝕個鞋底。當時會唔開心，會好羨慕人哋可以買靚衫，絕對有自卑心態，覺得高攀人哋唔起，但後來都已經習慣晒。」
當夢寐以求的波鞋真的捧在自己手上，周柏豪以奇妙來形容當時的感覺，「真係好唔捨得着，好似發夢一樣，終於自己可以擁有。雖然着到個底甩埋先扔，但自此我更加珍惜擁有嘅一切，依家買衫我唔會亂咁買，亦唔會只着一次就算。」
由粉紅色到黑灰
每人都有個人的「保險色」，即是穿得舒服的顏色，周柏豪的是黑和灰，當然找到穿衣定位前，必經過出亂子的階段。「初入行我會搽晒黑色指甲、留長髮留鬚，但之後為咗想個人sharp啲、想人哋見到我，就會着好多sharp color嘅衫，例如粉紅色牛仔褲。」
芸芸牌子中，合周柏豪口味的，是品牌Rick Owens，「Rick Owens係低調地玩浮誇，至今我有十幾件佢嘅items。好記得第一件item，係2005年差唔多入行時，我睇中Rick Owens一件$21,000、oversized、grunge look嘅皮褸，我仲做緊studio，當時得幾千蚊收入，但我表哥又係好喜歡fashion，佢雖然着唔到，但佢一句話：『我買你着！』咁就有第一件。」
包踭鞋有安全感
至於一對價值$16,000的Rick Owens象腿boots，是周柏豪的至愛items之一，也是入行以來買得最貴，也充分凸顯他那「特別癖好」。「我屋企有超過三百對鞋，最多係波鞋同boots，成日覺得鞋等於守龍門一樣，唔可以上身靚對鞋唔襯，否則有虎頭蛇尾感覺，破壞晒成件事！唔知點解，我一定要着包踭或高筒鞋先至有安全感，唔可以低過腳眼，真係半年都着唔到一次低筒，正如冬天我一定要戴頸巾一樣。人哋唔知仲以為我隻腳有紋身！」
現在常見女裝男穿，周柏豪說還未過到着裙那一關。「未接受到着裙，高踭鞋都要諗。但有次就係撞到boot鬼，又係Rick Owens！有對高踭boots，一着真係唔捨得除番落嚟，但真係買就只係着到一次，以前真係窮過，真係唔想浪費。女裝方面，有着過Ground zero，靚到我都想着。」
夢想的電動衣櫥
愛衫不等如同樣愛整理衣物，周柏豪說悔恨不懂擅用衣帽間的空間，所以現在客廳變為鞋倉，「啲衫褲鞋襪放晒喺eye level位置，着來着去都係面頭嗰堆，衣架嘅質素都緊要，否則掛到啲衫似骷髏骨頭咁！依家連個廳都堆晒鞋盒，行路要左閃右避，以前會每個鞋盒都貼晒相，但依家多到最入最底嗰對係咩都睇唔到。我夢想有個電動衣櫃，只要我喺個mon度睇相揀衫，佢就自動成套走出嚟，唔啱嘅我就丟埋一邊，個櫃又會識自動幫我掛番好。」
談緋聞噤若寒蟬
講買衫講自己，周柏豪講到口沫橫飛，但提到新鮮出爐的緋聞女友何家千金何超雲，周柏豪一本正經的，說跟對方根本不熟落，雖然自己愛衫，對方也同樣賣二手衫，理應更有話題，但周柏豪說大家只是見過一次的朋友。「平時都係微博，我諗見佢妹妹超蓮仲多過佢。我唔想外間成日用呢樣嘢做話題，費事以為我係好想去識有錢人、攀附啲名人咁。可能以前捱過，所以依家擁有嘅一切會好珍惜，唔會因為細個窮過而發錢寒，做人要有骨氣。」
採訪：蔡穎怡
攝影：秦健輝