新版Ovi Store Free玩本地薑
現時iPhone已有超過25萬個Apps，認真誇張！不過計我話，多Apps未必好，事關好多Apps都係由外國人編寫，香港用戶始終少了股親切感。相反Nokia嘅新版Ovi Store，近期就有大量本地Apps進駐，無論閣下想搵車搵樓、睇新聞天氣，或者下載人氣鈴聲，佢都幫到你。內容完全本地化，至啱貪新鮮嘅香港人！
撰文︰陳志滔 攝影︰郭凱敏（部分）
模特兒︰Yoyo Ng（Zmodel）
《ontv東方電視》隨身網上新聞
售價︰免費
Nokia旗下好多手機都對應3.5G制式，串流睇片自然成為一大賣點，若想24小時收看新聞及資訊節目，《ontv東方電視》一定係最佳選擇。《ontv東方電視》為24小時免費網上電視，全天候製作第一手新聞、財經、娛樂、生活、評論等節目及短片。用戶更可將喜歡的影片經Facebook分享出去，為友儕之間增加話題。
《GoHome》搵樓最佳拍檔
售價︰免費
買樓係唔少香港人嘅終身大事，所以揀樓唔同揀菜，事前務必做好資料搜集。《GoHome》正是為港人而設的房產搜尋程式，它既提供本地樓宇資訊，包括名牌屋苑市場走勢及價格動向等；更有齊各大屋苑及新樓盤成交資料，用戶只要透過搜索功能，足不出戶就能搵到心水靚樓，十分方便。
《香港第一車網》本地車迷聖經
售價︰免費
Ovi Store內汽車Apps唔算多，而且大多以遊戲為主，這款《香港第一車網》便是少數提供汽車資訊的程式。用戶可從中獲得最新本地及外國車資料，並可觀看駕車專家的試車心得及影片，最重要是內容經串流實時下載，提供車牌號碼拍賣、交通狀況等運輸署新聞，連搵食司機都照顧埋。
《香港天氣》流動天氣先生
售價︰免費
最近香港天氣乍暖還寒，唔想突然凍親，就要時刻緊貼天氣消息。《香港天氣》資料由香港天文台提供，內容相當廣泛，包括：天氣預報、分區天氣、空氣污染指數、紫外線強度及天氣照片等；當中更設有一個特別的「穿着建議」，替用戶選擇合適的外出衣物，免除揀衫煩惱。
《新浪微博》關注名人明星
售價︰免費
微博相信不用多介紹，現時大小明星都將生活點滴記錄下來，唔玩微博連阿姐都話你Out！而繼iPhone後，《新浪微博》亦終於登陸Symbian S60平台，除一如網頁版可以發帖及回覆外，仲可以「關注」名人，以後對方一發帖即會在手機自動Update，24小時緊貼星蹤。
藝人主題免費靚相鈴聲
售價︰免費
Ovi Store備有一眾本地歌手的手機主題及鈴聲，最新內容包括天后容祖兒的手機主題、演唱會鈴聲《空港》等。除了Joey以外，楊千嬅、陳偉霆、泳兒及海鳴威等主題、鈴聲及MV亦已經登陸Ovi Store，稍後還有明星觸控遊戲下載，畀大家邊睇靚相邊打機。