群馬利根男喪跳vs女搓粉
黃子華話過：「細個唔同女仔玩，所以大個畀女仔玩。」計我話，大個仔應該啱Key就一齊玩，唔啱Key不如分開玩。來到日本群馬縣的利根郡，好動男生，走去玩日本唯一的笨豬跳，從大橋一躍而下，挑戰膽量；文靜女生就去麵店學搓粉，D.I.Y.個私家蕎麥麵。一個地方，兩極體驗，日本群馬殊不簡單。
Bungy Japan 飛身跳落利根川
日本的川，實質就是河。男生們來到群馬縣的「關東第一激流」利根川，不為玩漂流，而是登上諏訪峽大橋玩Bungy Jump。笨豬跳的搞手是來自新西蘭的Charles，他曾在AJ Hackett（笨豬跳始祖公司）工作，十多年前移居日本，最初把笨豬跳帶到山形縣，至04年才移師到群馬縣，在諏訪峽大橋「開壇」。
從橋上下望，小記即時「熬底」！咪以為42米呢個數字唔大，它相當於20層樓咁高，我話唔驚就假啦。好在我自命小男人，話唔跳就唔跳，硬推同行的日本朋友去「跳橋」。大概是利根川的風景太美，雙腿已縛上安全綱索的朋友仔，企定定、深呼吸一大輪也未起跳，等大家狂數「1、2、3」，才能拿出勇氣一躍而下。見他迅速跌出我鏡頭以外，不消幾秒又從橋底「回彈」，如是者來回了幾次。這一刻，朋友仔「七分驚惶三分喜」表情，都清楚可見到。
話說回頭，究竟日本玩笨豬跳有多安全？Charles話這裏設備，均依足AJ Hackett的安全規格，鋼扣由奧地利進口，跳索則來自泰國，冇有怕咁話。見朋友仔都安然無恙，當然信晒佢。
Bungy Japan
地址：群馬縣利根郡水上町小日向143
收費：第一跳日圓7,500（約HK$712）第二跳日圓4,000（約HK$380）
時間：10:00am~4:00pm（星期一至五）9:00am~5:00pm（星期六、日及假期）
網址：bungyjapan.com
蕎麥館 溫柔整麵有一手
男人用「搵命搏」的方式證明勇氣，而聰明的女人，就會用「手藝」去證明自身的價值。水上町的豐樂館，就為女生們提供了一個大顯身手的機會。因為，這裏集「食肆」與「教室」於一身，來者可2至4人組成一組，齊齊炮製蕎麥麵，D.I.Y.自己的麵食午餐。
搓蕎麥麵，不可靠蠻力，大家得先將蕎麥粉與小麥粉，加入清水攪勻，然後慢慢揉搓成粉團，可是「初心者」（初學者的日文寫法）往往難以控制力度，把粉團弄得硬繃繃。幸好，有大嬸師傅出手，兩三下手勢就把粉團搓得軟綿綿，再用大碌木慢慢把粉團壓成餅，最後，就用刀小心把麵團切成條 —— 想好食就要條條切成2毫米闊，若不平均，下鍋後麵條會變得軟硬不一，影響口感。
切好的麵條交給大廚烹調，而我們等食的過程，猶如等BB出世一樣緊張。蕎麥麵終於上枱，大家先把它浸入專用的醬油，再品嘗「這條像薯條般粗，一定是你切的！」4人一組就是有這好處，不好吃可賴別人嘛！哈哈哈！
豐樂館
地址：群馬縣利根郡水上町須川847番地
時間：11:00am~3:00pm（冬季至2:00pm）
收費：蕎麥麵製作連午膳，二人同桌收費日圓2,000（約HK$190），4人同桌日圓3,200（約HK$304）
利根川洪潮瘋？
利根川是日本第2長河流，總長332公里，僅次於信濃川，其流域面積達16,840平方公里，屬日本第一。它的洪水曾以不受控制聞名，河道經常因洪澇而改變，故此，古人很難畫出其正確河道。直至17世紀，關東漸成日本行政中心，為建立完善的水上運輸網絡，利根川進行了一次大改造，河道於明治時期確定，現在那廣闊的分水嶺，大部分也是人造的。
遨遊備忘
簽證：持BNO或特區護照均毋須簽證
機票：香港飛東京來回經濟客位機票約$3,300起
交通：往Bungy Japan，可由JR上毛高原站乘巴士約11分鐘可達。往豐樂館，可從JR上毛高原站轉乘的士，需時約15分鐘。
貨幣：日圓100約兌HK$9.5
天氣：10月氣溫約13℃~25℃
特派記者：劉達衡
鳴謝：群馬縣、東日本旅客鐵道及日本國家旅遊局（JNTO）