PowerShot G12行山影HDR靚過海報

踏入10月，終於感到少許秋涼，趁着重陽時節，最好就帶埋Canon剛推出的PowerShot G12，登高行山影吓風景人像，學高手玩吓手動設定又得，用傻瓜場景模式影相亦得，加埋高動態範圍影像（HDR）拍攝模式，要影到翠綠背景加清晰主體真係話咁易。

售價：$4,180

HS System畫質提升

Canon近期新機加入咗唔少玩相功能，連今次G12都新增HDR拍攝模式，將3張不同曝光的相片分析光暗位進行合併，令動態範圍和細節層次更鮮明，配合28~140mm焦距，靈活咁將花草樹木盡收眼底。黃昏行完山，還可藉着內置的HS System及高感光CCD，手持拍攝Magic Hour美景，減低慢快門帶來的手震影響，趕走雜訊或鬆郁朦影像。

機背沿用上一代轉盤設計，無論轉換模式或睇相都好方便。

內置自動包圍曝光功能，一按快門會以不同曝光影3張相。

HDR模式內有多種顏色效果，可拍出海報油畫特效。

大人細路都啱用

PowerShot G系列向來以專業掛帥，G12更設有前置滾輪，拍友可根據自己的拍攝習慣設定滾輪功能，如快門速度、動態範圍及暗部修正等，最吸引是加入電子水平儀輔助構圖，影相就唔驚斜埋一邊。除了一般手動模式外，G12亦提供28種自動場景模式，幫你自動調校微距、人像、風景等最合適的設定，另可加入創意模式效果包括魚眼及油畫海報等，講創意正過街上海報或網上Wallpaper多多聲。

G12機頂依舊設有曝光補償調校轉盤，任何模式都用得。

另有濾鏡轉接環，由G10開始的PowerShot G系列都可使用。售價：$330

另有濾鏡轉接環，由G10開始的PowerShot G系列都可使用。售價：$330

新增的前置滾輪置於快門前方，用食指操控最方便。

扭芒自拍靚樣

人像自拍當然難唔到G12，新機可同時偵測9張人臉，配合多角度2.8吋扭芒設計，只要將個芒反轉再利用「Smart Shutter」一笑即拍或眨眼即拍，幫自己影靚相包冇甩拖。鍾意拍片的朋友還可用立體聲高清拍片，支援1,280×720解像度，想景物鮮明的話，可用高飽和度特殊效果，想錄低山下變得細小的大廈，則可用模型短片效果，將靚景盡收眼底。