激玩泥漿沙巴Mud都得

名廚周中師傅百足咁多爪，呢期就兼任導遊，決定帶同愛冒險嘅男男女女，踩入馬來西亞的沙巴（Sabah）。今次唔係玩陽光海灘，而係坐船去荒島，潛入深山玩泥漿嫩膚大探險；仲膽粗粗向沙巴獵頭王朝聖，目擊人頭戰利品！呢勻真係唔講得笑。

深山護膚泥

位於沙巴西海岸約6英里的迪加島（Pulau Tiga），除了擁有水清沙幼的誘人條件，仲有令女生兩眼即時發光的美肌素材，引得大批女生蜂擁而至。話說，山上蘊藏沙巴獨有的火山泥漿池。你知啦，火山泥係美肌勝品，抹上身能令皮膚變得滑溜，所以，就算行程係20分鐘泥濘山路，貪靚嘅女生都要頂硬上。

到埗後，只見一個可容納約20人左右，綠樹環抱的露天泥池。導遊話，泥漿由地底的天然氣驅動噴出，日積月累，變成此等模樣。女生們一於少理，躍入泥池，原來，池底深約2呎，泥漿如奶昔般涼涼滑滑，浸在其中好舒適。女生們毫不客氣由頭浸到腳，要每寸肌膚都得到嫩滑效果。不過，浸完咪立即沖身，你可慢慢下山，待身上的泥漿吹乾後，再跳入大海沖洗乾淨。現場所見，女生們都話皮膚白咗又滑咗。

泥漿仲可以「畫畫」。周中師傅幾欣賞呢幅「畫」！

市面一樽護膚火山泥價格不菲，到泥漿池梗要搽番夠本。

待泥乾完畢後，大家都索性跳入海中，然後再用清水沖身。

英勇男兒，就要跟師傅去土著文化村，朝拜獵頭王。

獵頭王朝聖

男生大多鍾意驚險刺激嘅事物，來到沙巴蒙索畢悅文化村（Monsopiad Cultural Village），就可以滿足箇中渴求。事關，文化村是為紀念了沙巴原住民族卡達山族（Kadazan）英雄蒙索畢悅而設的。其戰績在村內骷髏屋可見一斑──屋樑上掛有42顆人頭骷髏，全是蒙索畢悅在部族紛爭時斬下的敵方人頭。雖然，人頭都面目模糊，但一想到它們如何如何被炮製，教人毛管戙。

好在，村內也不盡是嚇人的設計，還有圖文並茂的部族歷史及卡達山族人生活文化。例如：文化村就是仿照當時部落房屋而建的，你可以到族人當時的家園，一窺當時的民生情況。村內同時也有了不少體驗項目，例如：品嘗村民慶祝豐收時的米酒Tapai、傳統民族舞表演等，加上有獵人王打扮的族民，扮到兇神惡煞跟你拍照，娛樂性也相當的豐富。