《Winning Eleven》近年形式同玩法都冇乜大改動，但今年終於認真地改良，加入號稱可以在球場上360度傳球及超過1,000種全新動作，交波系統兼球員AI更真實化，同之前幾代《Winning Eleven》嘅感覺好唔同。更特別係今次Konami在香港推出中英合版《Winning Eleven 2011》，首次加入中文操作介面，仲比日本早出兩星期賣街，夠晒誠意！
Konami可能見本地化設計對銷量真係有幫助，在《Winning Eleven 2011》首次嘗試中英文合版，可以揀選中文或英文介面，同時語音方面就有英文同日文選擇（Xbox 360版只得英文）。除咗中文介面外，今集最明顯改動在於操控系統，需要唔少時間去適應，好似交波咁樣，以前玩《Winning》睇住屏幕下方的能量棒就知力度，但今集卻將這支能量棒變成彩色圓圈放在球員腳底，同時控制力度變得更加重要，冇咗以前一撳掣即可到腳嘅情況，要睇準空位用適當力度，才可交出靚嘅陰濕波入楔，令交波路數和組織靈活性大大提升。
Konami話《Winning Eleven 2011》加入咗超過1,000種球員動作，當然實際有幾多就好難數，但可見到球員攞身位更真實，追波時會膊頭撞膊頭爭位，盤球時細微動作更仔細，加上可以360度傳球嘅新設計，都幾難好似前幾代咁「打Form」搵幾隻快馬屈速，因為今集防守球員的位置感更強，而且AI都提高唔少，速度唔夠高嘅話會用身位搭夠撞開對手，更考攻擊球員嘅過關斬將技巧。好在遊戲都畀番攻擊球員多啲技倆，今集可以做出更流暢嘅假身同插花等動作。
雖然要比實名球隊同球員，《Winning Eleven》始終唔及《FIFA》咁多咁齊，但《Winning Eleven 2011》其實已加入更多實名球會同國家隊，而且除了上集歐洲聯賽冠軍盃模式外，今集仲可玩埋歐霸盃同南美自由盃，係第一套可以玩齊以上三大盃賽嘅足球遊戲。至於一直玩開嘅Master League模式同球員育成模式，今集一樣有得玩。實際操控方面，今集改用更直覺的游標方式揀球員同排陣，加上遊戲節奏和操控都有顯著改動，就算玩開《Winning Eleven》嘅玩家都唔係一下子可以上手。
類型：運動
開發：Konami
平台：PS3、Xbox 360
推出日期：10月14日
售價：待定
查詢電話：2359 7998
撰文：布偉倫