Nokia World 2010直擊！　型商手機　E7拍埋高清

依家好多手機塞個Android系統就話自己係Smartphone，搞到部部機一模一樣，好鬼悶。老大哥Nokia就慢慢執正個新智能系統Symbian^3先推出市場。

官方終於在日前倫敦舉行的Nokia World上，公布4部新機，全部第4季有得玩，除早前在港發表的N8外，最注目就係E7，皆因4吋大芒配QWERTY鍵盤，睇得又打得，小記一於去倫敦直擊呢部新機有幾勁！

4吋大屏幕

E系一向係Nokia商務支線，旗下E71、E72部部都大賣，奈何依家啲客好貪心，又要Push Mail，又要Clubbing時打到機兼拍到片，而E7便正正為呢班客而設。齋睇外形，好似部放大版N8，同樣採用磨沙金屬機身，並有齊灰、銀、綠、藍、橙多色，襯衫一流！而且個芒有4吋大，視野更廣闊之餘，篤芒亦更就手。嫌虛擬鍵盤唔夠好打，佢仲可以側滑出QWERTY鍵盤，畀用家透過Mail for Exchange收取電郵後，快速打字回覆。

放大圖片	提供4行QWERTY鍵盤，每粒回彈力都唔錯，而港版推出時更加番筆劃碼。

最難得係E7僅比N8厚0.3mm，官方謂係拜一體成形所賜，不過冇得換電兼抽起microSD位，真係針冇兩頭利。

新系統整合晒所有來往通訊記錄，除對答式SMS，仲可以睇埋彼此電郵及MMS內容。

同N8一樣有HDMI輸出，跟機仲送埋接駁線。

沿用N8的Flick Scroll選曲系統，撥住封面揀歌仔。

HDMI輸出

N8內建1,200萬像素鏡頭令拍友齊聲叫好，但由於商務客對像素要求冇咁高，所以E7稍為降呢到8MP，鏡頭亦非蔡司鏡；然而佢仍然拍到720p@25fps高清片，之後又可剪接加特效，方便OL放工後拍片自娛。至於其他規格，USB 3.0、10.2Mbps HSDPA及802.11n Wi-Fi對比同級來說已經超晒班，最估唔到係提供埋HDMI輸出，加埋Dolby Digital Plus立體聲，返工播完Powerpoint返屋企再播片，一舉兩得！咁多嘢玩容量自然唔少得，佢就有16GB記憶體，配合1GB ROM，多多Apps都「單撈」得晒！