握軚坐姿不容輕視

隨着駕車經驗日漸提升，加上駕車不如學車般拘謹，有時反而會忽略了一些基本功，例如正確的坐姿、扭軚動作等，需知道駕駛姿勢唔好，會直接影響駕駛者安全，今次一於講講駕駛姿勢的三大重點。

1.座位留意距離

開車之前，應先調校好座位與腳踏之間的距離，一般而言，以背部緊貼座椅最為適合，留意椅背不能太斜，讓上身保持挺直，雙眼視線保持向前。調校座位時，應以左腳可以控制離合器及右腳可以控制迫力為原則。當左腳將離合器完全踩低，又或者右腳完全踩落迫力時，腳部都應該可以保持微曲狀態，相反如果腳部伸得太直的話，萬一遇上緊急情況，就唔可以提供足夠力度控制離合器去拖波減速及踩Brake停車。

2.軚盤注意高低

調校軚盤高低是經常被人遺忘的地方之一，尤以駕駛別人的汽車時較普遍。如軚盤高低位置不當，不但阻礙行車視線，亦會影響雙腳動作，增加發生意外機會。正確的軚盤位置有三個要點：1）手腕關節位可以剛好放在軚盤頂端；2）唔會頂住雙腳；3）唔會被軚盤擋住視線。

雙手應以適中力度緊握軚盤的兩點及十點鐘位置，方為正確。

Subaru Exiga 2.0GT 售價：$319,980

3.適中握軚力度

握軚時，手應握於兩點及十點鐘位置，但雙手仍可以保持微微屈曲。至於握軚力度方面，力量適中就可以，毋須出盡力緊握軚環，否則不幸發生意外時，好似突然「搶軚」的話，有機會令手部受傷。另外，扭軚過彎時，應以一手拉、另一手接的方式，千祈唔好交叉手、反手，或淨係用手掌去推轉軚盤，雖然睇落好有型，之不過這3種扭軚方式都會影響到突發狀況時的反應。此外，手心易出汗的朋友要注意跣手問題，有需要可戴上防滑手套。