迷你超合金擺Pose滿分！

雖然播《鐵甲萬能俠》時小記都未出世，但自小受遊戲《超級機械人大戰》薰陶，對1號機、真三一、魔裝機神等情有獨鍾，可惜佢哋出「超合金魂」成千蚊一隻，玩花咗都咪話唔心痛。好彩Bandai最近推出全新「Super Robot超合金」系列，14cm迷你Size二、三百元有交易，打頭陣正是鐵甲萬能俠1號機和2號機，出鐵甲飛拳、雷電轟擊等Pose打怪，關節可動性和配件逼真度超級驚喜！

（左）鐵甲萬能俠1號售價：約$260
（右）鐵甲萬能俠2號售價：$359

平價版鐵甲萬能俠

超合金一詞是由《鐵甲萬能俠》卡通所創，所以歷代合金玩具，總唔少得鐵甲萬能俠嗰份，今次嶄新推迷你版「Super Robot超合金」，相比超合金魂GX-45鐵甲萬能俠甚至GX-49飛拳版萬能俠，定價平一半有多，二百幾元就有隻合金玩，隨時平過砌隻塑膠MG，絕對有入貨衝動。

多關節出絕招勁爽

最吸引是金屬比例和活動能力，比傳統合金有過之而無不及，由頸部、腰胸到股部和小腿全以金屬製成，玩落都幾墜手，手腳更可屈曲超過90度，輕易做出跪地、拔劍等動作，原來新作特別選用抽屜式關節，使腰胸多個部位能自然擺動，實淨之餘平衡力大增，擺出經典絕招唔驚企唔穩。

「Super Robot超合金」（右）只有14cm左右，相比「超合金魂」（左）細粒2cm。	2號機飛行時，可在小腿插上飛翼，同卡通一模一樣。	隨盒附送岩石地台，摸上手其實係發泡膠，做得幾似喎。
雖然機身細小，但裝拆配件全部有齊，朋友號分體後比個五毫子還要細。