TX9 一掃全景搖出3D

自《阿凡達》後套套猛片都玩3D，隨之而來3D電視相繼湧入屋企，可惜巿面3D影碟唔多之餘，又要戴眼鏡極麻煩。Sony在全新Cyber-shot TX9首創3D一掃全景功能，輕輕一掃竟可合成立體照片，仲唔使戴眼鏡就睇到，只要將部機左右搖擺就可重現主體3D效果，成個真人彈出嚟！仲可接駁Sony Bravia電視及PS3遊戲機播3D，令睇相從此變得多角度。

售價：$3,390

iAuto+進階智合拍

TX9是上代TX7的加強版，論外形設計和篤芒操控更可說是一模一樣，同樣採用25~100mm蔡司Vario-Tessar潛望鏡頭，並支援1,920×1,080i AVCHD全高清拍片，只是新機強化一掃全景功能玩3D合成，想睇你左邊臉靚啲定右邊臉靚啲，搖吓部機就搞掂。另一賣點是新增iAuto+進階智合拍模式，影相時以自動場景功能調校最佳感光設定，遇到夜晚仲識得連拍6張相，疊埋一齊以減低雜訊微粒。用家可同時開啟背景散焦和美顏模式，令人像白淨滑溜之餘，還可營造出淺景深龍友效果，講玩相功能隨時勁過單反。

3D相片雙重玩法

很多人都知道3D影像需要雙鏡頭模擬人體雙眼視覺拍攝，但睇來睇去TX9都係得一個鏡頭，究竟點樣做出3D效果呢？原來Sony巧妙地利用Cyber-shot一掃全景和高速連拍功能，當相機由左至右一掃時，處理器便以每秒10張擷取影像，除了可模擬雙鏡「3D Sweep Panorama」模式，駁3D電視做番影院般立體效果，還加入「3D Sweep Multi-Angle」模式，直接將15張多角度照片疊埋一齊，當相機搖向左時，畫面便會側向左邊，搖向右就見到右邊，連立體眼鏡都慳番。

Cyber-Shot TX9採用紅、金、黑三色金屬機殼，推開蓋就着到機影相。

機身按鍵和上代TX差唔多，備有相片/影片模式切換按鍵，方便隨時拍1,080i影片。

機身按鍵和上代TX差唔多，備有相片/影片模式切換按鍵，方便隨時拍1,080i影片。

24mm廣角WX5平玩3D全景

若果唔習慣篤芒影相，但又想玩3D一掃全景影立體相，大可考慮Cyber-shot另一系列新機WX5，同樣採用1,220萬像素CMOS及BIONZ高速影像處理器，備有iAuto+進階智合拍、3D一掃全景、散焦及美顏等玩相模式，只是由潛望鏡改回24~120mm 5倍變焦Sony G鏡頭。最吸引是減省了輕觸式屏幕後，令售價比同級TX9平$700，仲抵玩。