收身Xbox 360 索爆誘人

撰文：布偉倫　攝影：陳富權、布偉倫 查詢電話：3071 4868

機身全面瘦身

雖然日版水貨機早兩個禮拜已經落場，但香港行貨新Xbox 360主機又平啲兼且有保養，所以今個禮拜先出手最着數。好似早幾日舉行嘅香港首賣會更一早派晒籌，證明變靚啲、變瘦啲確實有前途。新Xbox 360主機用上黑色設計，主機、無線手掣、耳機都係全黑，而且機面的黑色鋼琴面焗漆處理相當吸引。同舊型號Xbox 360一比，即睇得出兩者大細分別，新機無論高度同厚度都比舊機縮水，而且亦略輕，連火牛都用上較細嘅設計，自然慳位啲！

新機（上）機背擴充介面較豐富，內置HDMI端子、三組USB外，還加入Kinect 專用AUX端子。

新Xbox 360（右）機身明顯較矮較薄，而且線條亦更靚。

機靜又唔熱

外形固然靚仔咗，但小記最鍾意新Xbox 360操作時較靜同冇咁熱。舊主機開機時常聽見風扇轉動同Load碟聲，亦會感受到陣陣熱風；新機用上耗電量較低嘅新處理器以及改良散熱系統後，就算校細遊戲音量，都聽唔見雜音，亦唔覺得機身過熱，抵讚！新機還內置Wi-Fi無線網絡，接上Xbox LIVE打機唔使再拉線或另購Wi-Fi模組；而且制式更係802.11n，無論傳輸速率同接收範圍都比以往802.11b/g好。

新Xbox 360主機首賣會在剛過去星期日中午舉行，早在星期六晚上7時已經有人排隊。	新機（右）機身散熱位較少，主要集中在機身的側面。	火牛尺寸亦以新機（右）較小，擺放時較為方便。

直駁Kinect

上得Xbox LIVE，好多時都會下載新遊戲Demo，加上大量SAVE，搞到硬碟唔夠位，好在新機硬碟容量已經提升到250GB，好夠用。硬碟擺位都唔同咗，舊機設在機頂，而新Xbox 360主機就擺在機底，撬開面蓋，就可見到2.5吋SATA硬碟。同以往一樣，Xbox 360硬碟採用專用設計，想換的話都係要幫襯原廠。主機機背加入專為Kinect而設的AUX端子，方便將來直駁Kinect；至於Kinect有幾好玩，下個禮拜去動漫電玩節就可以親身試！

碟盤採用輕觸式開關，唔需要好似舊機咁用力。

用上2.5吋SATA硬碟機，擺放位置由之前嘅機頂改為機底。

新Xbox LIVE Arcade遊戲速遞

除新主機外，Xbox 360近期更力谷「Summer of Arcade」活動，由今日開始一連5個禮拜各出一款新Xbox LIVE Arcade遊戲，都幾有睇頭。

《Limbo》　

推出日期：7月21日　下載點數：1,200 MS Point

《Limbo》風格獨特，以黑白畫面描繪小男孩走進迷離同富有哲學意味嘅世界，進行的解謎冒險旅程，在今年E3遊戲展上備受矚目，更得到多個「Best of E3」獎項。

《Hydro Thunder Hurricane》　

推出日期：7月28日　下載點數：1,200 MS Point

快艇比賽遊戲，既刺激又配合到夏天主題；遊戲更為第一套可以用上分割畫面進行單機多人對戰（4人），兼連上Xbox LIVE（16人）對戰嘅遊戲。

規格表

硬碟容量：250GB 無線網絡：802.11n 體積：270×264×75mm 重量：2.9kg