30周年RG高達有骨氣

7月24日1:1高達於靜岡再次現身，而為慶祝高達模型（GUNPLA）30周年，同日仲加推RG（Real Grade）新系列RX-78-2高達，破天荒在1:144比例引入骨架設計，令細機體都可做出跪地、揸槍、拔劍等高難度動作，精細度直逼MG和PG系列，但定位卻只係$200左右，難怪Bandai預期至2011年初可賣到50萬隻咁驚人！

售價：$229

RG骨架拔劍揸槍掂

高達模型30周年企劃認真大陣仗，先有1:1高達、《Gundam 00》電影、獨角獸高達，再來RG模型誕生，無論60後至90後都為之着迷。RG震撼之處是以1:144手掌咁細嘅機體，做到史無前例的靈活性和真實感，秘密在於裝甲內藏骨架設計，令手腳、腰部及全身均可作多角度轉動，配合猶如人體肌肉的連動外組裝甲，即使手腳180度摺埋都唔怕扭斷。第一彈用番阿寶架RX-78-2，Fans怎能錯過？傳聞第二彈是馬沙紅彗星，相信Z、ZZ等陸續有來。

207個部件易砌免上色

造型方面，亦由於採用外組裝甲，所以部件多達207個，差不多是同屬1:144的HG系列兩倍，令每個細節都能還原真實高達設計。但別以為咁多Parts就好難砌，基本骨架出廠時經已一體成型，即係只需將手腳和身體合埋，而裝甲砌番落相應部位就搞掂，唔似早前MG 2.0個骨架要左砌右砌咁麻煩。最正是RG高達連裝甲都幫你上埋色，單係隻腳的白位就分3種層次，仲印埋刻線和釘孔，連模型油都慳番。