荷里活多年前已開始將暑假檔期提前到每年5月開始，小朋友還未放暑假，各大猛片已排隊打仗！繼《通天奇兵》同《波斯王子》後，嚟緊有多套大片出籠，若閣下仲係心急等唔切，建議玩住iPhone電影Game熱定身，唔單只史力加同反斗奇兵任你舞，仲有o靚妹最冧嘅《吸血新世紀》，未入場就可同「殭屍仔」羅拔柏迪臣日對夜對！
《吸血新世紀3：月蝕傳奇》為避南非足球盛事，拖到今日先上畫，搞到一班o靚妹師奶心急如焚！好彩官方早於5月底就推出iPhone遊戲，畀大家一解對殭屍仔嘅相思之苦。遊戲開始前要先揀選角色，由Edward到大隻人狼仔Jacob都有，之後要解答過百條電影問題，答中愈多分數愈高。留意每局只有3次機會，自問係《吸血》狂迷的話不妨挑戰。
7月1日上畫嘅《史力加萬歲萬萬歲》，講史力加點樣對抗神秘侏儒怪，將Far Far Away世界撥亂反正。遊戲由夢工場開發，以全3D立體操作，透過虛擬按鍵控制史力加做出跳躍、攻擊、怒吼及回旋踢等動作，打倒敵人取得金幣及禮物來換取成就。遊戲還提供驢友及貓俠兩個角色，每個都有不同的搞笑對白，將惡搞風格移植到iPhone上。
《反斗奇兵 3》剛剛喺美國打破史上動畫片開畫紀錄，電影要7月15日先喺香港上映，不過iPhone Game就率先起錨。遊戲係電影嘅一個綜合平台，除咗有預告片、新聞及迪士尼最新產品等資訊外，透過它還能開啟《Toy Story Mania》小遊戲，有篤氣球、掟飛碟等Mini Game。雖然難度唔高，但操作容易又畫面細緻，Kill Time一流！
八十年代回憶通天奇兵
無論動畫迷、電視迷還是玩具迷，都期待這齣八十年代大熱劇集的首部改編電影。遊戲跟電影同步推出，玩家要控制由水牛、鈍胎、喪榮、霹靂仔組成兼各有所長的僱傭兵，將敵人全部射光就爆機。遊戲採用昔日街機最興嘅橫向2D畫面，並設有20關，各有不同難度Boss級大佬，篤吓芒就可開槍掟兼手榴彈，簡單又爽快，令人投入感大增！
Iron Man遊戲早喺App Store出現，第二集仍然係3D動作遊戲，任務更變得多樣化，如拆彈及救人質，絕非一味「打打殺殺」。今集仲有升級系統，打倒敵人後可獲得金錢來升級武器及技能，耐玩性大大提高。另外，電影大部分角色如War Machine及「鞭狂」都會粉墨登場，而且劇情跟電影互動，睇完戲再玩保證更投入！