林莉絢麗救模界
「翻版林志玲」林莉在今年書展面對一眾來勢「胸胸」的o靚模完全無懼意，言語間嘲諷模界應百花齊放，卻不能繼續助長歪風，騷胸弄姿只會令模特兒行業沒落咁話！
林莉面對一眾o靚模「胸」湧而至，也不敢怠慢，早前處女下海到上海拍攝首本寫真集，一連兩天共換了二十多套服飾，她接受電話訪問時說：「本寫真集係玩Mood同造型，除了Elegant外，還有Sexy、Wild同Cool的一面！」寫真效果理想為她打了支強心針，她說：「原來我可塑性咁高！」問到拍攝期間的趣事？林莉表示雖然過程辛苦，卻很Enjoy：「我每天都要影十幾個鐘，根本冇時間瞓，連轉妝轉髮型都要屈喺架車度，真係冇啖好食。」
傳緋聞男友認購一半
面對一眾o靚模，林莉自言毫無懼意，坦言對自己充滿信心：「大家唔同Market，唔同路線，本應模界百花齊放係好事，但唔希望花園裏只得一種花，做模特兒應該係百變，唔係一味靠性感出位！」她繼續嘲諷表示難於評論對與錯，只希望大家傳遞正面訊息：「宣傳冇問題，但唔應該偏埋一面只Focus個胸，佢哋應該發掘自己多啲優點，唔健康風氣再吹落去，只會令模界變質兼沒落，成個圈都以性感行先！」
據知，首批寫真集推出五千本，內部認購已佔去一半，餘下數量不夠分給各大書商，問到林莉內部認購者是否老闆兼緋聞男友，她支支吾吾表示不清楚。
文：名人組