遊細界:清熱

馬來西亞料理味濃、辛辣,就算沒有味精,都足以吃得口乾喉涸,更何況昨日談到的「小桃苑」馬來咖喱蝦麵火鍋着實太美味,我們幾乎把整個湯底都喝光,喉痛、生暗瘡是應該的!

旅遊局方面安排周到,先讓大家逛逛兼買手信,再到Day Spa做個按摩,讓大家落格之餘,又可以Relax一下。回程之際,少年食神Michael提議:「不如食消夜囉!」唉……是日腸胃應該收工吧?不過Michael說:「難得來到,食盡啲!」高人叫到,腸胃,你哋體諒我吧。

我們所住的Shangri-la Tanjung Aru,正門外的不遠處正好是Tanjung Aru第一灘度假區,這裏有一個熟食市場,是許多遊玩沙巴的遊客必到的地方,因為這裏食物又平又美味,而且有我們港人的至愛──燒雞翼!市場有一條巷全都是燒雞翼檔口,一排排雞翼在炭火上吊燒,的確幾壯觀。雖然食味比不上KL的「黃阿華」,總算可以頂一刻「雞翼癮」。

又吃搶火的東西,一定要喝些降火的飲料。馬國流行桔仔冰,不過都喝了四、 五趟,於是改點西瓜汁。檔主問:「靚仔,大定係細?」我答:「大呀,阿姐!」端上來的……比普通飲品大兩倍!可能太口渴了,不消20分鐘我就全部喝光。當晚回到房間,睡前的兩小時不停解手,相信同房會以為我腎虧!不過,翌日起床時,喉乾的感覺已一掃而空,相信都是拜那杯一公升西瓜汁所賜。

旅遊撰稿人

李兆祥