超欣GaGa上身賀11歲
賭王何鴻燊與四太梁安琪的愛女何超欣11歲生日，昨晚舉行大型生日會，超欣以偶像Lady GaGa金髮加bodysuit型女造型現身，蛻變為一名活潑少女；六月將會赴英國讀書的超欣，今次的生日會同樣是歡送會。
四太梁安琪孻女何超欣本月12日生日，正日與家人度過，昨晚就與一班同學仔及好友在深灣遊艇會搞大型生日派對，以「Alice the Wonderland」為主題。超欣約傍晚六時與家姐何超盈到場，壽星女Lady GaGa上身，戴上金色長假髮，頭上一個大型蝴蝶結，面上畫閃電圖案，穿上黑色bodysuit配黑皮褸加長boots，狂野造型絕對令人眼前一亮！
短期內不會返港
超欣表示媽咪還未看過她這造型，而生日願望則希望一切順利。超盈表示妹妹鍾意Lady GaGa，所以兩人均以Lady GaGa造型現身，被問到送上甚麼禮物時，她說：「爹哋送咗錶，我就送衫同埋呢個派對，個造型都係我幫佢整，個派對籌備咗好耐。（妹妹會否上台唱歌？）唔會，入場有人表演，其實所有賓客都會以Lady GaGa打扮到場。」超盈又透露，超欣將於六月到英國讀書，短時間內都不會在香港慶祝生日，故此今次的生日會亦會是妹妹的farewell派對。
賭王怕嘈拒現身
不過，超盈表示爸爸賭王不會現身派對：「佢尋日（前日）先同我哋食午飯，已慶祝咗兩日，同埋佢唔鍾意小朋友咁嘈。」被問到會否擔心妹妹到英國讀書？她說：「超欣學校好近兩個哥哥嘅學校，佢哋會照顧佢。不過爹哋好唔捨得佢，所以開咁大型生日會。（11歲就過去讀書太細？）差唔多，我哋都係呢個年紀過去，佢細個到依家都好獨立，識得照顧自己。（驚唔驚佢拍拖？）無所謂，不過都唔會，佢讀女校，又係寄宿，都唔會識到男仔。」
採訪：名人組