實景導航Galaxy S搵食最易

香港出名係美食天堂，但唔少女仔認路都好差，一個人行街搵食成日要打畀姐妹求助，好彩依家有新科技幫手，Samsung新機Galaxy S預載Layer實景導航功能，輸入目的地就有3D立體圖幫你搵路，加埋有個4吋Super AMOLED靚絕大芒，以後想蕩失路都難！

售價︰$5,588

50萬個興趣點

隨着近年GPS發展成熟，增強實景是（Augmented Reality，簡稱AR）程式愈來愈流行，Galaxy S個Layer實景瀏覽器就由Tele Atlas合作提供，用家只要打開鏡頭，再輸入搜尋目標，實景上便會多出一層虛擬Layer，並以紅點顯示目的地位置，最細心係每行一步，紅點便會跟着方向改變，跟住行就包冇錯！目前程式共提供全球50萬個興趣點（POI），包括餐廳、提款機、油站及便利店等，睇啱還可以查詢地址同電話，即時訂枱話咁易！

陽光下睇書

除實景導航，Galaxy S還有很多貼心功能，例如首頁有個Daily Briefing小工具，可在同一頁面更新天氣、新聞、股票及行事曆，變相多了一個私人秘書。它還提供Aldiko電子書工具，支援放大文字、虛擬書籤及翻頁效果，並可即時留下書評及感想，用法跟iPad的iBooks好似。而為提升閱讀效果，Galaxy S還內置了4吋Super AMOLED屏幕，比一般TFT更清更亮，而且反光度低，即使陽光底下都睇得好清楚。

Daily Briefing係個人小秘書，能即時更新天氣、股票及新聞等資料。	Aldiko介面同iBooks好似，但暫時只有兩本英文書，日後要到Samsung Apps網上商店購買。	主功能菜單激似iPhone，左右換頁亦跟上下換頁的Android公版不同，最多可裝10頁程式。
Layer實景導航要配合鏡頭使用，輸入搜尋目標後，畫面便會以紅點表示目的地，紅點會隨距離縮短放大同改變位置，跟住方向走便唔會錯。	手機支援802.11n無線制式，上網速度快其他Wi-Fi機幾倍，遺憾係Android Browser未支援Flash，睇唔到ontv新聞短片。	塑膠底蓋經過焗漆處理，表面又有圓形暗花，外觀不錯，但僅配備5MP鏡頭，而且不設補光燈，影相效果一般。

1GHz極速處理器

系統方面，Galaxy S採用Android 2.1系統，但UI介面就升級成TOUCHWiZ 3.0，最多可放7版Widgets，而在1GHz處理器幫助下，各式Widgets可同時運作，唔比多工作業的新iPhone 4輸蝕。但稍稍要彈鏡頭僅有500萬像素，兼冇補光燈設計，夜晚影相效果一般；幸好佢支援一笑即拍、人臉對焦及720p高清短片等進階功能，影完仲可經DLNA技術隔空傳到電視機欣賞，拍攝配套才不致太失威！