陳碧舸衣錦還鄉身價漲3倍
模特兒陳碧舸（Bonnie）上季在紐約時裝騷初試牛刀，反應不錯，現決定衝出亞洲，走向國際大舞台，不但簽了國際大型模特兒公司Next，來季還會到米蘭、巴黎及紐約行騷。
Bonnie在香港一年多，簽約Style模特兒公司，做熊黛林師妹，現與Style約滿，簽了美國的Next模特兒公司，上季到紐約發展，一口氣行了十幾個品牌的時裝騷，還做了時裝品牌Benetton的全球廣告模特兒。另外，她又為美國著名品牌Victoria's Secret拍硬照，Bonnie說：「佢哋出咗條新時裝系列，以健康年輕為主，覺得我適合，所以搵我，我係呢個品牌第一個搵嘅中國模特兒。」
仲有上升空間
Bonnie現大陸、美國兩邊走，在大陸行騷，酬勞升價三倍，Bonnie說：「酬勞比以前好好多，但我始終都係啱啱去美國行騷，仲有上升嘅空間。我嚟緊都會去歐洲行騷，不過會以美國多啲，因以前喺美國讀書，熟悉當地環境，而大陸同香港巿場都唔會放棄。香港依家雖然冇經理人公司，但之前同Style嘅經理人 Kim合作得好愉快，而且唔係放太多時間喺香港，所以冇再簽佢哋，將來有機會都會再合作。」
意想不到效果
Bonnie今次着上恩師張天愛的時裝拍硬照，操刀的是內地著名的攝影師李昊閻，Bonnie亦大讚他專業，拍攝只用了個多小時就完成，而且拍出來的效果好國際化，有意想不到的效果。
文：名人組