五色石春FinePix XP10潛入Facebook

夏天嚟喇！又是沙灘、三點式、水上活動的時候，在一望無際的海邊暢泳，總唔少得帶部防水DC，同朋友潛落水底玩互拍，得閒又可以曬太陽影靚女。出名色水靚的Fujifilm近日推出XP10新系列相機，千幾元便有齊防水、防撞、防塵、防凍功能，雖然個樣似足石春，但加入Facebook上傳軟件，啱晒年輕網絡一族，令石春都可以潮得起。

售價：$1,880

全新XP系列四防設計

Fujifilm XP10是繼上年的Z33WP後，第二款真正「落得水」的相機，除了支援3米防水標準，還可抵受1米撞擊、-10度嚴寒和沙塵滾滾的惡劣環境，稱得上是巿面最迷你的四防DC，握在掌心同拎住粒石春差唔多。講揸手和撳掣可能冇大機咁好用，但勝在135g輕巧便攜，放入褲袋都冇問題，仲有紅、藍、綠、銀及黑5色任揀，難怪早前在日本推出咁受歡迎。

博客模式上傳方便

單睇XP10的拍攝功能，內置1,220萬像素CCD和5倍光學變焦鏡頭，規格與同級防水機差唔多，但按下去發現多了「博客模式」和「網絡上傳」選項，擺明是針對網絡玩家而設計。博客模式能在影完相後進行裁剪、亮度和色彩調校，仲可以幫唔想出鏡的朋友打格仔，修改完只要到選單Mark低所有靚相，當連接電腦上網時，便可透過附送的「MyFinePix Studio」軟件直駁Facebook和YouTube，省卻登入網站揀相等麻煩程序。

操控按鍵沿用Fujifilm相機設計，啟動SR Auto後便能自動調至合適場景。	採用Fujinon潛望式鏡頭，達到36~180mm 5倍變焦效果，而防震則改為電子式設計。	雖然細機冇DSLR咁好揸，但在握手位加上防滑膠粒，單手拎落水影相都唔怕跣手。
揭開底蓋可見到mini-USB插頭，駁電腦後便可利用「MyFinePix Studio」上傳靚相。	特別加入博客模式，可即時裁剪及調校相片色調，還可替臉部加上馬賽克。	瀏覽影片或相片時只需分別Mark低「YouTube」或「Facebook」，駁電腦便可直傳至網站。

SR Auto場景高清拍片

拍攝操控方面，承繼了Fujifilm優良傳統，除Auto、P Mode和人臉偵測全部有齊外，另備有SR Auto自動場景偵測，影夜景、人像、微距等都能自動調校合適設定，還可手動調至水底、日落等指定場景，簡單一按就影到靚相。最吸引是連防水機都支援1,280×720拍片功能，在水底一樣拍到靚畫質，還可套入黑白或懷舊色調，迎合高清YouTube浪潮。