諸葛梓岐為爆機廢寢忘餐
諸葛梓岐（Marie）前晚在日本出席TGA時裝騷後即返港，昨日以一身Cosplay造型到美麗華商場出席PS3《FINAL FANTASY XIII》活動。Marie表示乘凌晨機回來，她說：「瞓都冇瞓，好辛苦。今次做頒獎嘉賓企喺台上覺得好緊張，因為要講日文。（喺日本知名度點？）台下有好多人同我揮手，後台都有好多人同我合照。」
Marie造型明顯較密實，問她會否介意以性感Cosplay造型示人？她表示：「如果係工作OK架，我專業吖嘛。（有冇打機？）有，我鍾意玩射槍同打交呢啲比較男仔頭嘅遊戲。（男友打唔打機？）打。（去你屋企打？）通常啲朋友都嚟我屋企打，有時女仔朋友會打到過夜。」她又透露自己最瘋狂一次是為了要打爆機，兩日兩夜不眠不休甚至不食飯。
