足球青年軍衫閱世界盃
四年一度的球壇盛事世界盃還有幾星期便舉行，全城已掀起這股足球熱潮。不少球迷睇世界盃除用眼睇外，更會「親身上陣」，換上波衫為所支持的球隊打氣。身為香港青年軍足球隊成員的劉卓軒及黃威，趁着世界盃前夕，率先換上幾個主要國家球隊波衫，更大談世界盃心水球隊和邊讀書邊踢波的苦與樂。
睇好西班牙捧盃
屬港隊青年軍及於剛升上乙組深水埗球隊擔任中前場的黃威，細個同成班朋友玩玩吓開始接觸足球，後來都是參加暑期足球訓練計劃後被教練選中，成為港隊青年軍。自西班牙贏得歐洲國家盃後，吸引愈來愈多球迷追捧，今屆世界盃西班牙更成為大熱，連威仔都睇好西班牙會捧盃。「我最鍾意係西班牙，佢哋啲足球好好睇，國家隊成員個個都好出色，我最欣賞効力巴塞隆拿的中場主將恩尼斯達，佢雖然細細粒但係好醒目，傳波好出色。」講到決賽戲碼，威仔估計是西班牙對好多香港人支持的英格蘭。「因為英格蘭外圍賽踢得好好。」同軒仔剛剛相反，威仔比較鍾意設計簡單的波衫，所以眾多示範波衫款式中，最鍾意是荷蘭隊作客的全白波衫設計。
邊踢邊讀書有幾難？
威仔每星期為深水埗隊練三次波，要同時練波同返學真係幾辛苦。「好在依家球季剛剛結束，所以時間較為鬆動，所以即使現正值考試期間，亦不會有太大影響。」
估決賽 巴西VS西班牙
所謂虎父無犬子，劉卓軒七歲時受父親影響開始踢足球，其後某年暑假參加了一個青少年足球訓練計劃，繼而進身成港隊青年軍，更是來季升上乙組的深水埗球隊球員之一，負責中場中間位置。今年世界盃他睇好巴西同西班牙。「我最鍾意係巴西，因為佢哋組織好，球員質素平均。另一隊心水係西班牙，平均質素好外，個個球員都好勁，好有冠軍相，所以我估決賽會係巴西對西班牙。」雖然身為足球員，不過軒仔就沒有儲波衫的嗜好，但就有買自己最鍾意球隊曼聯的波衫。講到波衫款式，他鍾情顏色設計，不過他最鍾意的波衫不是自己捧那隊巴西的勁鮮黃款式，反而是棗紅色的葡萄牙。「我覺得葡萄牙件波衫最靚，因為顏色好Sharp好搶眼。」
邊踢邊讀書有幾難？
軒仔同威仔一樣，每星期為深水埗隊練三次波。「每星期有一場比賽，訓練不算太密集，所以就算依家讀緊中四，都可以同時兼顧練波同返學時間。」
環保高科技球衣
近年時裝界掀起環保熱，就連球衣亦不例外，今年由NIKE負責設計的國家隊球衣，全部採用100%循環再造聚脂纖維物料，每件球衣由八個回收塑膠水樽循環再造而成。由此循環再造聚脂纖維所製成的NIKE Dri-FIT物料所造成的球衣，比以往品牌球衣輕身13%，更快蒸發水分保持通爽，而球衣兩側及球褲腰位，設有通氣位提升透氣度，令球員更涼快。今屆品牌為9支決賽周球隊提供波衫，其中巴西、荷蘭、葡萄牙、南韓及塞爾維亞球衣會於香港有售。
撰文：朱寶茵
攝影：陳世昌（人物）
查詢電話：2375 2175