Lumix DMC-G2篤篤即拍

近年相機、手機乜都加入篤芒功能，出親街都見到人左篤右篤，可是玩過篤芒影相就知道，由對焦到快門閃動總是慢半拍，搞到張相鬼咁震。為此Panasonic改良Micro 4/3換鏡相機，在DMC-G2加入Venus Engine HD Ⅱ雙處理器和270度輕觸扭芒，大大提升篤芒連拍反應，真正做到一篤即拍。

售價：$5,790（淨機身）、$6,990（連14~42mm單鏡套裝)、$8,990（連14~42mm及45~200mm雙鏡套裝）

反應超快

G2將輕觸拍攝功能融入換鏡相機，以電子屏幕感應取代機械式快門，完全扭轉大機拍攝概念，難得用3吋芒影相反應超快，想Focus靚女雙眼或捕捉後面背景，影邊個位就篤邊個位，由篤芒、對焦到快拍完全同步進行。最吸引是拍720p高清片時，都可以篤芒Focus玩景深，還可加入「我的色彩」轉換懷舊、菲林等色調，將各種場景模式套入影片內。

270度扭芒調校設定

對新手而言，篤芒另一優點是就算唔熟悉複雜的按鈕，都可利用Q.Menu直接篤芒調校光圈快門、ISO感光度、白平衡等拍攝選項，影相時還可篤住主體局部放大10倍，用大光圈鏡頭就唔怕Sharp咗第二度。G2另一親民設計是在機身加入Lumix系列的iA智能拍、IR影像優化和認人先決等模式，如果GF系列都有得篤芒同咁多嘢玩肯定再掀熱潮。

獨立的iA智能拍按鈕，讓換鏡相機都能像Lumix細機一樣使用自動場景影相和拍片。	G2只要加裝接環，便能AF使用4/3系列、Leica M系列及R系列鏡頭，仲可插上收音咪拍片。	如果唔識玩換鏡相機的複雜設定，轉到簡易模式篤芒便可開關常用功能，仲有轉盤加減光度。
左邊的AF、MF轉盤多了揀選對焦模式新功能，一扭便可啟動人臉對焦、鎖定追蹤、多點或單點對焦。	由於Micro 4/3減省反光板設計，讓鏡頭光線直達Live MOS感光元件，令篤芒影相更迅速。	機背沿用Lumix一貫按鍵設計，只不過多了Q.Menu目錄，快速轉換ISO、白平衡等設定。
手動對焦時可篤芒局部放大10倍，咁就唔怕Out Focus；睇相時亦可掃芒將原相放大16倍。	所有操控功能都可在屏幕找到，一篤便可調校光圈快門、拍攝模式等，完全唔用按鍵都掂。