世界盃出街睇

出外觀賞世界盃，應該是今屆香港球迷的特色。

撰文：張超駿　攝影：黎劍華　鳴謝：adidas

放大圖片

放大圖片

轉睇立體

今屆南非世界盃為首次國際賽事引入立體廣播技術，10個場館中有5個場館設有立體攝影機，拍攝部分分組賽、16強、8強、準決賽、季軍賽及決賽，合共25場賽事。香港球迷雖然未能像美國及西班牙般安坐家中享用立體頻道（前提當然要有立體電視機），不過一樣有緣感受箇中立體。事關鐳射娛樂已奪得相關版權，待食環署審批後，如無意外會安排在有立體電影播放功能的戲院播出。

有關方面稱，今屆25場有3D轉播的賽事都會播出，票價由$150至$300，院線則暫時未能公布。可惜最得港人歡心的英格蘭隊，其小組賽卻不被列入3D播放名單，要感受朗尼的立體射門，就要祈求英格蘭能順利晉級了。

慢鏡精彩

其實早在今年初，英國負責播放英超聯的天空體育，已率先在阿仙奴對曼聯一役作出立體播放。球迷要走到特定的酒吧，透過立體眼鏡觀賞賽事，對於這次新嘗試，當地普遍反應不俗，不少人認為最精彩是射門片段的慢鏡重播，尤其畫面採用對正龍門背後的攝錄角度時，真的有「個波射埋嚟」的第一身感覺，突破一直以來平面電視感受。但亦有球迷指出不少可改善之處，例如球場的深度、球員的質感雖有明顯升呢，但整體上還是維持一貫的拍攝手法，欠缺球員近鏡突出3D效果的鏡頭；另外有人指出，酒吧的47吋電視不夠大，影響立體影像的表現等等。

不過有心入戲院睇波的球迷可放心，相對英超採用16部3D攝影機，今屆世界盃則出動25部，角度更豐富；另外香港球迷透過立體電影院的大屏幕及音響裝置，應該會比在酒吧觀賞更貼近現場感受吧。

商場睇波

為新播放技術提升而高興的同時，香港在轉播世界盃亦有另一項「突破」，傳統的四條免費頻道首度跟世盃無緣。想安坐家中睇免費波，最基本要求係電視機可以收到數碼台，方可觀賞4場免費轉播。如果自問捨不得花錢入戲院、裝有線或買數碼解碼器，其實尚有零支出的睇世盃途徑：事關發展商新鴻基已經向有線購下全部64場世界盃賽事播映權，大型商場apm、大埔超級城等，一如上屆將會裝上大型電視作免費直播。此外，房署亦跟有線商討，希望旗下的商場可播出揭幕戰、兩場準決賽、決賽4場賽事及其他賽事精華片段，假若真能成事，對於住得偏遠較隔涉的球迷，便有更多就腳選擇。

睇焦點賽事

如果家裏冇裝有線，還有機會可安坐家中睇波的機會。你可透過無線及亞視的數碼頻道，又或是有線一台，欣賞到世界盃當中4場賽事：分別係6月11日南非對墨西哥的揭幕戰、7月6至7日的兩場四強賽及7月11日的決賽。兩台的數碼頻道亦會播出64場賽事精華、6個世界盃特備節目，唔想出街睇波咁頻撲就要留意了。

均宜撐立體世盃

「畢竟係第一次立體世界盃，當然好奇想睇吓跟平面的分別。但始終覺得足球比賽經常要用遠鏡去交代，立體技術很難發揮，足球向觀眾迎面飛來的鏡頭應該冇乜，但期望立體世界盃比平時睇直播有更多球員埋身的鏡頭，讓球迷可睇到更富層次感、更真實的球星。而且去戲院有咁多人陪睇，應該更接近現場睇波的熾熱氣氛。如果票價訂於$80左右，應該會吸引球迷入場。」

恆匯撐商場睇波

「由於家住圍村，高清跟有線都無緣享用，聽講傳統頻道冇得播今屆賽事，當然覺得好可惜。不過上屆世界盃我曾到apm做表演嘉賓兼順便睇波，發覺喺商場睇波氣氛相當不錯，觀眾之多令人意外。由於都是一家大細的觀眾為主，感覺上相當斯文，唔似酒吧的球迷咁激動。不過缺點係要坐定或企定，唔似喺屋企咁隨意。如果有巴西隊播出的賽事，應該會約埋朋友到商場睇波。」

3D世界盃25場賽事

日期 賽事

6月11日 南非對墨西哥

6月12日 阿根廷對尼日利亞

6月13日 德國對澳洲

6月14日 荷蘭對丹麥

6月15日 巴西對北韓

6月16日 西班牙對瑞士

6月17日 阿根廷對南韓

6月18日 斯洛文尼亞對美國

6月19日 荷蘭對日本

6月20日 巴西對科特迪瓦

6月21日 西班牙對洪都拉斯

6月22日 尼日利亞對南韓

6月23日 加納對德國

6月24日 斯洛伐克對意大利

6月25日 葡萄牙對巴西

6月27日 B組首名對A組次名

6月28日 E組首名對F組次名

6月28日 G組首名對H組次名

7月2日 8強

7月3日 8強

7月3日 8強

7月6日 4強

7月7日 4強

7月10日 季軍戰

7月11日 決賽