停工多時專心湊仔的娜奧美屈絲，復出後片約不斷，於新戲《愛在你左右》中飾演到處留情的放蕩女子，不受束縛卻偏偏遇上人生最難的抉擇，惟真正的她卻對男友情有獨鍾，還坦言恨再生女！
記：記者 娜：娜奧美屈絲
記：其實你真人同喺《愛》中嘅角色Elizabeth好唔似，會否好難投入得到？
娜：唔會呀！我聯想到佢唔信人嘅感受，因為我本身比較開通、且係個可靠嘅人，而佢（角色）就受過太多傷害，傷痛程度令佢變得冷漠，我明白到有時傷害太重令人變得自我保護。
記：你喺戲中同森姆積遜有親熱場面，佢以前冇拍過床戲，拍之前有冇討論過？
娜：冇乜點討論同綵排，雖然導演羅德高加西亞講咗好多嘢。不過，個劇本寫得好好，而且好清楚。
記：拍呢類場面時，你會諗啲乜？
娜：其實都幾醜怪，因為好明顯係私人嘅事，不過我之前都拍過手淫戲，兩個難度都差唔多，拍嘅時候就諗「呢個女仔好特別」，佢嘅恐懼就同佢嘅勇氣一樣大，好鍾意呢種錯綜複雜。
記：講下你私生活，同男友利夫舒拉比嘅大仔就快三歲、細仔就歲半，有冇諗住再生？
娜：如果可以保證生女嘅話，我一定會生多幾個，不過我知實會再生個仔！
記：很難家庭、事業兩兼顧嗎？
娜：我同其他在職媽媽一樣，每日都好努力做到最好，工作上小心做決定，做個好媽媽，亦會預留時間畀我嘅利夫。雖然唔知自己係咪做啱，但最少知道自己已做到最好。
記：對演員來講會更加難做到嗎？
娜：其實所有要工作嘅媽媽都會埋怨自己做得唔夠好！舊年我拍咗三部戲，其中有半年休息，做演員嘅好處就係我哋可以帶住小朋友周圍去，開工時佢哋喺休息車玩，其實對比起返朝九晚五嘅媽媽，我哋反而有更多時間同子女相處。
記：依家四十出頭仍有咁多唔同角色演出，覺得自己冇入錯行吧！
娜：我喺荷里活有五年舉步維艱嘅生活，每次試鏡都會被指唔夠天分、做得唔啱，或者係唔夠靚、唔夠性感。我有諗過唔演戲，轉做餐廳或雜誌，但都畀唔到同樣嘅感覺，當時我經常得番二百蚊（約一千五百六十港元）喺袋，係妮歌潔曼畀我希望，佢同我講只要有一部好戲、一次試鏡，所有事情都會改變。
娜奧美前年年底誕下細仔後再次復出，新片一部接一部，除了年初已經上映的黑金危機外，她與辛潘合作的《Fair Game》及由活地亞倫執導的《You Will Meet a Tall Dark Stranger》，亦將在下月的康城影展上映。
早前剛完成了與丹尼爾格力和麗歌慧絲合作的電影《Dream House》外，現在則忙於另一部新戲《Untitled Comedy》，另外還有三部片約，可謂荷里活的搶手媽媽。