周汶錡願向黎明獻第一次
名模周汶錡（Kathy）出道以來，行騷、演戲、主持、出書樣樣有做瓣瓣掂，笑言遺憾至今還未拍過MTV，坦言「第一次」要獻給男歌手外，若跟黎明合作即使有親熱戲份都冇所謂，不怕樂基兒（Gaile）會呷醋！
Kathy連續第二年擔任「膠原蛋白專家」ULTIMA II代言人，並第三次為品牌拍攝新一輯電視廣告，因要配合後期製作，Kathy常要對空氣做戲，笑言演技由此大增！
強調冇瞞婚
廣告拍了十多個小時，由於現場冷氣甚大，一向怕凍的Kathy拍完即告病倒，她說：「好彩第二日唔使配音，事關把聲沙到配唔到，病咗成個星期至好番。」法籍男友Julien Lepeu有否病中照顧？向來低調不談感情事的Kathy說：「哈，唔使啦！自己識得照顧自己，唔想傳染其他人，我都要保護身邊嘅朋友。（成日咁低調處理感情，會唔會感情有變都唔講好似瞞婚咁瞞分手？）哈，總之我冇結婚，OK啦，一向都唔講私人嘢。」
親熱戲都得
入行多年的Kathy，自言試過出書、拍戲和主持，但卻從未拍過MTV，她笑說：「真係一個遺憾，好多model初出道都會拍過，曾經有人搵我，但咁啱時間就唔啱，咁普通嘅嘢都未做過。（想拍咩MTV？）最緊要型同靚，跳舞都得，有親熱戲份都冇所謂，同邊個拍都得，最好第一次就畀男仔啦。（如黎明搵你拍但有親熱戲份，怕唔怕Gaile呷醋？）冇所謂，大家都係專業，我諗Gaile唔會呷醋！」
Kathy財多身子弱，除了拍廣告後病倒外，早前往日本旅行時又病倒，她說：「去日本食咗好多嘢，仲睇Lady GaGa演唱會，不過其中一日係發燒，我成日都喺酒店瞓，好驚唔退燒返唔到香港。」
文：名人組