任達華咀君如囡囡審問
出爐影帝任達華獲拍檔吳君如在慶功宴上吻賀被女兒在報紙上看到，女兒即問他愛君如還是琦琦多些，他竟坦認自己有兩個最愛，不過原來一個是戲內，一個是戲外。
前晚任達華（華仔）和愛妻琦琦拍拖出席《Alfred Dunhill Hong Kong Home》開幕活動，他透露早前女兒任晴佳竟問他愛君如多些還是琦琦多些，華仔說：「我個女突然問我，因為佢睇報紙見到我同君如kiss，佢問我鍾意呢個（君如）多啲定係琦琦多啲？我聽到真係覺得好sweet，我同佢講君如係我戲中最愛，仲問佢記唔記得有日帶佢去永利街拍戲，我又同佢講現實生活中呢個（琦琦）先係最愛。」雖然聽到老公有兩個最愛，但身為華仔真正最愛的琦琦一點都不介意，還說：「個女仲問我幾時叫佢（君如）個女出嚟玩。」
送君如開心禮物
華仔又揚言要送一份能令君如一家都開心的禮物給她，他說：「就係一個video，可以即時拍完即時喺任何地方投射放映，佢仲可以借Peter（陳可辛）個背脊嚟投射。」對於有指惠英紅有意參演羅啟銳和華仔合作的新片，華仔亦表示很想成事，他說：「我希望君如同小紅（惠英紅）都有份做嚟個大團圓。（得獎後會唔會加片酬？）唔關事，最緊要係有好導演。」身旁的琦琦則說：「拍戲心態唔會改變，只係心情改變。」
茶餐廳搞慶祝宴
問到囡囡可有送禮物給爹哋，琦琦說：「佢畫咗本書，係佢五歲以嚟最有心機嘅禮物。（你會送咩？）未諗，本來想請好朋友去酒店搞個poolside party，但佢話唔好，茶餐廳就得，夠實在。」華仔即笑說：「又冇菠蘿包同雲吞麵！」至於會否送個BB給老公，琦琦聞言即好大反應：「唔係嘩？」
有此一着
影帝嫂琦琦一身閃爆造型現身活動，一向愛bling bling的她，選擇Chloe 2010春季西裝外套，皆因外套上鑲滿Swarovski水晶，其杏色絨帽亦同樣鑲滿了Swarovski，完全是她的style，不過論到最bling爆的，一定非由任達華去年送贈的鑽石戒指莫屬。
文：名人組