徐濠縈女兒第一老公第三

前晚阿徐與老公Eason各自各精彩，分別出席b+ab時裝展與Van Cleef & Arpels高級珠寶系列發布酒會派對，阿徐因女兒（康堤）在微博的照片被批評扯晒火說：「你知我唔抵得頸，話我個女就唔得，我當然要反駁。（Eason知唔知？）佢笑住話自己唔會好似我咁大膽同直接，話我有性格，可能佢見人多較為圓滑！」

搞時裝殺出血路

平時湊女為樂的阿徐不會復出幕前，做時裝工作就得，更自認已被淘汰：「點會有人搵我，以前我做戲都唔好，依家我做時裝生意就為自己殺出一條血路，五月尾會喺尖沙咀開分店，正式進軍九龍區。呢盤生意做得好開心，又可以喺屋企處理到，我同partner講，學Kelly（陳慧琳）話齋，個女行先，事業先係第二。（Eason第三？）佢都要排第三，佢都希望阿媽錫個女，應該感到安慰，因為男人冇咁細心，個女真係好黐我同跟我o架！」

陳奕迅笑言成日送鑽石給老婆，就不矜貴。

葉梁美蘭與陳奕迅合照。

未恭喜霆鋒得獎

對好友霆鋒勇奪金像獎最佳男配角，阿徐沒有恭喜對方：「睇佢咁情深款款，佢個世界好似只得老婆、囝囝同快出世嘅BB，我諗Eason應該有恭喜佢。」她說與霆鋒久沒敍舊，記者笑言可待栢芝分娩時在醫院相聚並將BB相放上微博，她即說：「唔好搶人哋，係人哋私隱，要先得到佢哋批准。」

女模展示品牌的新款首飾。

Models於Van Cleef & Arpels酒會中一字排開，甚具氣勢。

另邊廂的Eason坦言Van Cleef & Arpels曾贊助他演唱會：「贊助個蜻蜓鑽石襟針，但我整唔見咗粒鑽石好唔開心，好彩佢哋唔介意。（有冇送珠寶畀太太同個女？）我買書畀佢多，個女仲細，未使買嫁妝住！（阿徐鍾意珠寶鑽飾？）係女人都鍾意鑽石，不過買得多都唔矜貴。」對康堤在微博被批評，Eason說沒有看到。有關全國哀悼日要暫停娛樂表演一事，他說既是國家決定表示贊成，公司正籌備賑災，演藝人協會亦會搞。 文：名人組