南非世界盃打到嚟，官方足球遊戲《2010 FIFA World Cup South Africa》有乜新花招？今集晒冷收錄199支國家/地區球隊，連世界排名百幾嘅香港隊都有份，
兼且全體用晒真名上場，夠誠意；再加上射十二碼可出陰招，又有大量挑戰性甚高嘅場景模式任打，睇怕未到世界盃開鑼，球迷們已有一對熊貓眼！
《2010 FIFA World Cup South Africa》系統同玩法都係建基於《FIFA 10》，玩開的話唔難適應，而且設定簡單咗，例如將《FIFA》按鈕編排改為「New Alternative」排法（即係《Winning》排法）可以在揀掣時一按搞掂，唔使再入選單慢慢轉。
每集《FIFA》推出時，都係賣「真實」，到2010世界盃版就賣「多」，當中共收錄199支國家/地區球隊，相信唔少國家大家都未聽過，總之想用邊隊打世界盃都得。舊年東亞運捧盃嘅港隊咁威水，想在遊戲中用番嚟挑戰世界盃冇問題，但香港最Top嘅「陳七」（遊戲中名稱：Chan Siu Ki）能力值只得62，睇吓大家有冇咁好功力啦！
雖然香港球員人樣唔多對辦，但世界級球星就整得幾似，而且用上真波衫同真球場，甚至可以在遊戲中率先欣賞多個南非為世界盃趕建而成嘅球場。今集球場包裝得好有嘉年華會氣氛，打打吓波會見鏡頭Pan去熱情嘅球迷身上；而且今次仲係第一次可以在球場上見到成地彩紙碎，雖然對畫面質素冇大影響，但睇落真係好有現場氣氛。
遊戲中球員動作唔多見有幾唔同，但感覺上又順過《FIFA 10》；最唔同係今集射十二碼可以玩窒步，只要按完射波掣後到正式接觸到足球前再按射波掣，球員就會窒一窒先射波，不過對電腦試射咗十幾球，龍門都唔會因窒步而撲錯位，睇嚟只係對真人先有用。
同前幾集一樣，遊戲加入咗「Captain Your Country」模式，化身成為球星落場，甚至能夠匯入《FIFA 10》嘅虛擬球員，延續賽事。最搞鬼係EA同Coca-Cola合作搞咗個「The Story of Qualifying」模式，可以玩到多達五十幾個真實球賽出現過嘅場景挑戰外，到今年世界盃舉行期間仲會不斷加入今屆球賽嘅關鍵時刻，輸到差啲想掟爛電視嘅球迷可以喺遊戲改寫歷史，又諗得幾周到！
類型：運動
開發：EA Sports
平台：Xbox 360、PS3
推出日期：4月27日
售價：$329（Xbox 360）、$380（PS3）
查詢電話：3166 6001
撰文：布偉倫