時裝系學生半工讀為創自家品牌

凌晨先有得瞓

現年24歲的Berrick，剛於今年年頭與幾個朋友合資喺觀塘工廠區租了一個單位做寫字樓，專接學校、內地公司或私人球隊做衫辦，有時Berrick還會幫手親自做設計。雖然辦公室只有約300呎，但已經很見使。「因為我哋全部人都係用業餘時間嚟Run呢盤生意，唔會日日返Office。暫時做咗幾個月好多嘢都已經上咗軌道，不過總係覺得時間唔夠用，要同時兼顧功課、上堂及生意唔係件易事，好多時要做到凌晨先有得瞓，真係少啲精力都唔得，好彩自己仲後生捱吓冇所謂，最緊要搵到錢完成大學課程。」

生意初哥固然要捱，但可以熟習做衫的程序，對將來建立自己品牌絕對有大幫助。「讀時裝設計起碼令我對布料剪裁等有認識，買布做衫時唔會畀人呃，慳番唔少錢！」之不過Berrick話最怕客人睇穿佢成個o靚仔咁而壓價。「唔少客人同我交談時發現我係生意初哥，趁機壓價，有啲更走我數，搞到依家要絞盡腦汁諗辦法追數，所以香港的半工讀學生真係唔易做。」

Berrick話讀時裝設計令佢加深了對布料、設計及剪裁的認識，同客人溝通時有很大幫助，起碼不會讓人覺得是個門外漢。

由於有Partner的家人在內地設有廠房，所以不少生意均來自內地，做童裝辦是其中一類。

喜以技能賺錢

自小在父母的安排下學鋼琴，直至小學五年級時對鋼琴有點厭倦，於是停了一年，後來因太耐冇彈而有點心掛掛，於是升讀中一後再次練習。「學任何一樣嘢都會有個厭倦期，慶幸自己知道真係鍾意鋼琴，所以叫自己唔好咁輕易放棄。」

問到Amy半工讀辛唔辛苦，她笑住話：「幸好自己喜歡音樂，起碼好過唔少打工仔面對自己唔喜歡的工作做得唔開心！不過教小朋友過程要夠耐性，有時對住佢哋都會有點不知從何入手，我會盡量諗辦法解決，絕對唔會半途而廢。一星期唔會將所有空餘時間用來教琴，亦唔會諗住賺錢而走堂，雖然搵錢唔多，但起碼夠日常生活費，能以自己的技能來賺錢，感覺非常滿足！依家會儲起錢用作將來做自己品牌的資金，為未來鋪定做Fashion Designer的路。我已經諗定將來品牌的風格，會行較實際的設計，唔會過於天馬行空，不過會將自己對音樂的專業滲入設計中，成為個人品牌的獨有風格。」

Amy每日隨身物必然有樂譜一大堆，方便教小朋友或技癢練習時用。

教小朋友的過程要有趣味性，例如多鼓勵小朋友的參與性，以故事形式講解曲譜的情感，增加他們的投入感。

Berrick

理工大學時裝設計系二年級

曾做過Freelance Garment工作，對時裝充滿濃厚興趣，將來希望建立自家女裝品牌。

Amy

理工大學時裝設計系二年級

5歲起學鋼琴，已獲演奏級文憑，曾作多次公開表演。早前小試牛刀替商場設計籌款BB衫，將來希望建立滲有音樂元素的自家品牌。

撰文：黃佩琪

攝影：胡淑儀、陳世昌