Lisa預告隨時嫁得 吳彥祖上網學生仔
娛樂圈盛行秘密結婚，不過凡事總有例外，好像型男吳彥祖（Daniel）和名模女友Lisa S.拍拖多年，他指若日後結婚定必公告天下，並笑言沒甚麼值得秘密。其他藝人認真要學習一下。
前晚癌病初愈的藝術家Simon Birch構思製作「Hope And Glory」活動，吸引大批名人明星捧場，包括貝安琪、尹子維、李彩華及Rosemary等。其中吳彥祖和女友Lisa S.拍拖赴會，Daniel透露近日為新戲減了十八磅，他說：「因為戲中我係飾演一個宅男，成日喺屋企上網。（咁你真人係咪宅男？）都係架，我淨係鍾意玩電腦，而且到我哋呢啲年紀，都唔想出去玩，只係鍾意玩狗，我哋係boring couple（夫婦）。」
賴美國性教育差
問到何時成為真正的夫婦？在旁的Lisa即鬼馬地說：「或者星期四，又或者星期六，又或者一個鐘頭後。」至於會否先造人生BB？Daniel說：「冇所謂，睇吓邊個得閒？不過我哋都要學吓點生BB，因為美國嘅性教育唔好，要上網睇。」
他又謂特意前來捧Simon場，因對方的求生意志令他大為感動：「令我會更加珍惜身邊人，（幾時真係結婚？）到時一定會同大家講，（唔會秘密結婚？）有乜好秘密？我哋都一齊咁多年啦！」
Ana R.真空上陣
同場的Ana R.則與貝安琪一起到場，問穿上開胸工人褲唔扣鈕的Ana是否真空上陣？她即風騷地說：「你哋要唔要檢查一下？（近來好性感？）只係客戶要求啫，不過我都黐晒膠紙，好安全架！」記者笑指單身的她定必吸引很多飛來蜢？Ana笑言來者不拒。
貝安琪與緋聞男友尹子維前後腳到，對母親讚對方好男仔及不反對二人拍拖，貝安琪笑說兩人現今並無拍拖，但坦承有發展可能，又讚對方整嘢食叻，對他親手做的意大利糕仲回味無窮呢！
文：名人組