劉心悠做未婚媽媽隨時Ready
趙薇產女一事成為熱話，劉心悠雖不認識對方仍送上祝福。眼見身邊朋友有不少已成家立室，心悠亦坦言想做媽媽，更不介意未婚產子，表示不會拘泥於一紙婚書，就算遭長輩反對亦冇所謂！
雖然前晚天氣轉涼兼下微雨，但一眾靚女包括劉心悠、諸葛梓岐和黃婉佩等只是以單薄春夏新裝上陣，出席日本時裝品牌ATSURO TAYAMA及A.T的花生騷，而Mandy Lieu和Jessica C.則擔任模特兒行騷，演繹最新春夏系列，散發浪漫與型格兼備的時尚氣息。
想華哥做金像影帝
劉心悠表示開季以來仍未置裝，所以趁此機會看看靚衫。談到即將舉行的金像獎，問她可有心水影帝人選？她想也不想便說：「華哥（任達華）！我希望佢可以成為雙料影帝，我好鍾意佢嗰套《天水圍的夜與霧》，我覺得都係時候係佢喇。（佢有兩部戲提名，驚唔驚會分薄選票？）唔怕，兩部咪50、50囉，加埋就100喇。」心悠又表示睇好吳君如奪影后。
對於另一候選影后趙薇日前誕下女兒一事，心悠雖不認識也沒有見過對方，但得悉後仍開心地恭喜她。心悠表示最近有很多人生BB，自己最近也參加了朋友兒子的百日宴，至於可有衝動生BB，她說：「依家冇，但將來結咗婚之後要生三個。（接唔接受到做未婚媽媽？）如果各方面Ready咗我唔係太介意，係老人家會介意啲，自己覺得只係簽一張紙，唔係太在意。」
諸葛梓岐低調拍拖
同場的諸葛梓岐就再強調和男友的感情沒有問題，感情生活開心，她又指不想經常將感情事掛在口邊，透露已和男友約法三章少講感情事：「唔講佢（指男友），私人嘢想畀番啲空間。（係咪要低調啲？）可以咁講。」對於早前有報道指其男友與前女友殷櫻仍有聯絡，梓岐表示無聊事不回應，更直言有人作古仔，而男友也沒有因此不開心，因不是事實，只覺得好笑。
文：名人組