Hea玩戶外美勞課
5日紅假又到Last Day，人人都想搵個遠離煩囂的地方Hea吓！偏偏選址問題考起無數父母，畢竟有大有細，太偏僻唔方便，冇嘢玩又會悶親小朋友……如果這一刻仲係零頭緒，於大埔白鷺湖互動中心舉行的「DIY歡樂嘉年華」，應該幫到你！除了有機會親親大自然，一家大小更可以在鳥語花香的陪伴下，跟導師學做小手工，共度溫馨的下午。
親子齊做小手工
背靠大埔滘自然護理區的白鷺湖互動中心，既可觀賞到紅樹林、小白鷺等自然生態，亦有多項遊樂設施，諸如水上單車、充氣玩意等，一向適合一家大小Hea吓、玩吓。最近中心更大搞「DIY歡樂嘉年華」，以大自然為美勞教室，大小朋友可跟導師學做多項小手工，如手偶製作、麵包烘製等，開開心心享受親子時間。見到小Model Oyen笑到「依」起棚牙，就知有幾好玩啦！
DIY玩邊科？
示範1 手偶製作
利用色彩繽紛的絨布，剪成不同形狀，拼貼出造型獨特的手偶公仔。
示範2 印第安沙畫
以各種顏色的沙粒，拼湊成畫面生動的圖畫，發揮創意。
其他好玩活動
除了玩手工藝，中心內的玩樂設施亦十分多元化，可謂動靜皆宜，一家人要充實歡度假日，真係話咁易！
親親小山羊
在白鷺湖畔，住了一群黑草羊，小朋友可近距離接觸，亦可向中心購買糧草，一嘗餵飼樂趣。
湖上踏單車
來到鐵路沿岸的白鷺湖，可試玩划艇或水上單車，親身體驗詩人筆下泛舟湖上的寫意生活。
充氣跳彈床
場內設有軟綿綿的充氣彈床，跳跳紮的小朋友可盡情在彈床上跑跑跳跳，將無窮的精力發洩出來。
DIY歡樂嘉年華邊度搞？
白鷺湖互動中心大埔紅林路2號
幾時搞？
逢星期日及公眾假期
1:00pm~6:00pm
點收費？
遊戲券每張$30（大小同價）
費用包括一項DIY手工藝及一項遊戲（充氣遊戲），可額外購買充氣遊戲票，水上單車則另行收費
查詢：2657 6657
撰文：英美茵
攝影：張群生
模特兒：Jo、Wivina（Komsomolsk）、Oyen