HTC Legend無縫Art

Smartphone其實跟o靚模差唔多，iPhone型格外觀、聰明內涵，娛樂性爆燈似足周秀娜；相反，年紀輕輕、開放源碼嘅Android，就跟Janice Man一樣極富可塑性。日前Android又變身，新出HTC Legend是全球首部鋁金屬一體成形手機，無縫設計猶如藝術品，呢部「無縫Art」連一代女神都讚好！

光學感應取代Trackball

「o靚界女神」JM經常現身潮流雜誌，影埋影埋唔少靚相，不過佢望到HTC Legend就自愧不如：「我用開嘅手機都係膠殼，用耐咗接合位好容易積塵，搞到好肉酸！相反呢部機嘅殼由鋁金屬切割出來，完全無縫，想入塵都難，靚晒！」除咗防塵，一體化設計還有助偷薄機身，令厚度僅有11.5mm及只重126g，比上一代Hero輕巧得多。而為加強流線感，沿用已久的Trackball已經取消，取而代之的光學感應器，操控比以前更加靈活。

系統升呢

有個Cool爆外表，冇內涵一樣徒然，呢方面Legend亦學足JM般不斷充實自己，例如Sense介面便作出不少改良，以前要用手指左右拖拉才見到7個頁面，如今只要用雙指在屏幕向內一拉，便能在一版內Show晒所有頁面縮圖。除此以外，系統還升呢到Android 2.1，除咗可同時登入多組Google帳戶外，還終於對應藍芽傳送檔案。值得一提的是，新機追加了鈴聲調節技術，反轉會靜音，拿起時則降低音量，設計夠晒人性化。

售價︰$4,198	機背有啲似iPhone 2G，但佢有齊500萬像素鏡頭及LED閃光燈，影相勁好多。	提供3.5mm介面，毋須miniUSB轉插線便能接駁耳機。
僅厚11.5mm，薄過晒HTC歷代Android機。	機尾微微翹起，聽電話自然更貼面。	機身並冇電池蓋，要更換SIM卡、記憶卡及電池就要拆開機尾，設計未算方便。

統一社交網

JM個Facebook有成4萬幾個Fans，加埋Twitter帳戶，逐個朋友更新都有排搞。呢方面Legend就幫到手，全新工具Friend Stream可在同一版面內，同時瀏覽來自Facebook、Twitter、Plurk及Flickr的訊息更新，以及朋友分享的圖片與連結，有回應只要寫一次，便可同時發送至以上社交網站，方便到爆！另一方面，Legend亦強化了文字搜尋功能，只要長按網頁上的文字，便可經字典、維基百科或Google翻譯查到相關內容。