200港星齊撐丁氏夫婦微博晒恩愛！
今年中國跟「博」字特別有緣，一個係上海世博，一個係新浪微博，前者仲有個幾月先到，未Hit到埋身，但後者卻熱爆祖國，推出未夠半年就有超過7,500萬人次註冊。咁多人玩，全因星味夠濃，非但容祖兒、黃宗澤、Angelababy、張敬軒玩到唔停手，連楊千嬅都成日同老公隔空傳情，再加埋佢哋啲私密生活照，真係好睇過娛樂版。作為一個網民，依家仲玩Twitter唔玩微博實在唔夠潮！
撰文︰陳志滔 網址：t.sina.com.cn
咩係微博？
很多人以為微博是社交網，但佢嘅正統名稱係Microblogging，顧名思義即係部落格的袖珍版，用字少兼有字數限制，收發比社交網有效率得多。論知名度，Twitter一定全球最紅，不過內地Twitter玩唔到，所以微博才應運而生。
當中內地的新浪網於去年9月推出名為「新浪微博」服務，功能上跟Twitter大同小異，但由於背靠13億同胞，引來大量名人插旗，港星有楊千嬅、容祖兒；運動員有易建聯、田亮等。而基於名人效應，粉絲亦陸續加入，目前累積登記人數已達7,500萬人，比香港僅有的13,000個Twitter用戶，可謂「蚊髀同牛髀」！
明星紮營
以前明星興寫Blog，不過佢哋好多都唔夠時間，或者不諳輸入法，就算寫都交由助手代勞。相反，新浪微博可以用iPhone或其他手機留言，手寫輸入幾隻字話咁易，最重要係佢哋對內地粉絲特別好，化妝Set頭食飯素顏咩都Post一餐，因此呢度往往睇到明星另一面！
千嬅私生活（關注人數︰297,599）
楊千嬅耐唔耐都會同丁生喺度晒恩愛，一時擺燭光晚餐相，一時又晒命有花收。最肉麻係丁生又會轉載番老婆嘅留言同相，一唱一和好好睇！
Baby出浴照（關注人數︰44,161）
Angelababy內地知名度唔算勁，但佢就好識做，成日放出Show相同雜誌封面上去，一來可建立潮流教主地位，二來女仔睇完可以照住襯衫，好有心！另外，字裏行間睇到佢好有思想同孝心，抵讚！
其他知名微博
內地的微博仍然係新鮮事，這兩年新微博多如雨後春筍，除了新浪微博，最具代表性是以下3個︰
主席都玩 人民微博
由人民網研發，並於今年2月2日下午正式對外公測，也是中央重點新聞網站推出的第一個微博服務，當中集齊各部委及地方黨政官員的微博，最大賣點係連國家主席胡錦濤都登記過！
網址：t.people.com.cn
自訂版面 Plurk
又名噗浪，於2008年5月12日推出，最大特色是可在同一時間睇到自己及朋友的所有訊息，並提供多個背景及控制版主題，用戶也可使用CSS來自訂自己的頁面。雖然限制字數為140個，但漢字及字母都計1個字，因此特別多台灣人使用。
網址：www.plurk.com
Google Buzz
用戶只要登入Gmail，便可看到好友的微博內容，又可跟他們分享相片及YouTube影片。它還能跟Google Maps整合，在地圖上直接顯示位置及留言。
網址：www.google.com/buzz
微博新詞
網絡逢有新服務誕生，便有新詞彙出現，玩微博，以下詞語及身份唔可以唔識︰
詞語
關注︰好似Facebook咁Add朋友，被人關注愈多，人氣就愈勁。
搶沙發︰即搶梳化，指搶先作新帖的第一個留言者。
織圍脖︰圍脖是「微博」的諧音，「織圍脖」解在微博上發言，而用戶之間則互稱為「脖友」。
微波爐︰微波（博）爐，將舊話題翻新炒熱的意思。
身份
V︰新浪微博會對名人進行實名認證，若是本人便會在用戶名後加上字母「V」字，以示與草根用戶的區別。
脖領兒︰脖（博）領兒，微博中被關注率、點擊率最高的用戶。
鉑金︰取「博金」諧音，指含金量高、很有名望的微博客。
伯爵︰伯（博）爵，多為知名人士及各行業裏的「專家」。
老伯︰老伯（博），最早玩微博的人。