天下一統 唱K大件事
正當大家視線放在Neway兩位「家嫂」爭風頭的新聞時，Neway已經默默完成「一統天下」的大業，收購同業最大兼唯一對手加州紅，即是Neway已經壟斷卡拉OK市場，一K獨大。以後大家是否要唱貴K，一切有待分曉，但自唱K興起的廿多年，集體回憶數落確有不少，來到K史新一頁，你記得多少件K壇大事？
撰文：劉達衡 攝影：郭凱敏
鳴謝：Club Zodiac（場地提供）
卡拉OK起源
卡拉OK，日語為「カテォヶ」，意解「無人樂隊」，泛指沒有主唱人聲卻有影音伴唱之娛樂活動，始於1971年日本人井上大佑發明首代音樂伴唱帶及卡拉OK伴唱機，到了80年代中後期，VCD成熟並取代錄影帶後，卡拉OK才得到真正普及。
K人K事 記得多少？
飛圖MTV 疲勞轟炸
凡成長於90年代，無不記得飛圖的梁雁玲，事關其鋪天蓋地式MTV廣告攻勢，近乎「疲勞轟炸」。當年的梁，其實為台灣飛圖音樂公司的股東及創始人之一，由於製作卡拉OK受制於音樂版權，故成立唱片部捧自己歌手，本常客串MTV中美女的她，順勢被捧成歌手，之後《像霧像雨又像風》、《慢慢地陪着你走》唱到街知巷聞，被封作「卡拉OK女王」。
唱K計分器 中國人發明
曾一度在K場流行的「卡拉OK電腦計分器」，人人以為是日本人傑作，但據知其發明者，原來是中國人。據《我的成功可以複製》述，當年專業於語音處理的唐駿，因愛唱K而隨便造了一個「計分器」來玩玩，怎知極受朋友歡迎，他開始嘗試向當年卡拉OK機大廠「先鋒」自薦技術，惟被拒絕，最終卻給當時小公司韓國「三星」看中，以8萬美元向唐買斷專利。後來三星因「計分器」發大財，轉賣專利給先鋒時更升至500萬美元，另每台機還要加3美元。
初代「K王」李思捷
當年Big Echo熱衷搞卡拉OK比賽，很多人都記得容祖兒由此出道（及後亦有胡諾言），但肯定不知比祖兒更早贏得Big Echo比賽的「K王」竟是李思捷。前Big Echo老闆Apple姐憶述：「當年有朋友推薦他（李思捷）來參賽，結果真係贏咗，我仲想簽佢做歌手，可惜佢當時要返美國讀書才作罷。」當年李思捷才14歲，憑一首《戀愛交叉》奪冠，難怪今日扮「哥哥」特別傳神。
K歌、K電影誕生
卡拉OK入晒屋，更影響埋音樂，由譚校長的《卡拉永遠OK》，到奪盡大獎的陳奕迅《K歌之王》到近幾年側田《男人KTV》仍樂此不疲；同時間，為遷就大眾易於發揮唱K歌喉而生的「K歌」亦於90年代成為粵語歌主流，甚至在2001年時出現以唱K為題的電影《男歌女唱》，香港人唱K已經入血。
初代主題K房
今天唱K，很多歌迷Fans都特別喜歡唱自己偶像的「主題K房」，但第一代主題K房主角其實是Hello Kitty。Hello Kitty K房最初於日本推出，極受歡迎，後來Big Echo引入並一度成佳話，據知1997年時鄭秀文尤其愛來「Hello Kitty K房」唱歌呢。
K壇獨市像賣漢堡
對於Neway收購加州紅，前Big Echo老闆娘劉麗萍（Apple）並不感意外：「呢行係咁，過去Neway也收購過前衞，當年也透過同事問過我（Big Echo）價，我仲反問番佢哋（Neway）價添。」Neway壟斷K場，大家豈非要唱貴K？「咁又未必，太貴未必有人唱，而且除咗連鎖式卡拉OK場外，目前尚有很多小卡拉OK場仍生存中。」
唱片公司新歌又會否少了宣傳渠道？「加州紅是被收購，但非結業，渠道未必少了。就拿『麥記』作比喻，它分店最多，賣漢堡包也賣到像獨市，但它也不會不賣廣告，因為保持商業形像也很重要，相信Neway也不會那麼短視。」日後唱片公司又會否收少很多歌曲版稅？「本來卡拉OK公司要拿大舊錢畀唱片公司（又非作宣傳用）就不是很健康。香港的音樂事業，應該是要聯手合作搞好的，例如早期唱片公司專注努力製作自己的歌曲產品，卡拉OK就幫忙宣傳，無論市場或廣告業也興旺點。」
喬寶寶因為《愛情陷阱》
自從90年代「卡拉OK」普及後，影響過萬千個生命，包括不黯中文字、卻能熱舞熱唱廣東歌的喬寶寶：「我以前返屋企，日日好似返印度咁，因為日夜只播印度歌，直至聽到《愛情陷阱》和《Monica》，先知廣東歌咁正，我仲落廟街搵卡式帶係咁聽……以前在懲教署打工時，那裏有個員工專用的卡拉OK吧仔，我咪起勢咁唱囉！我的廣東話，都係那時同犯溝通得多、唱得K多練回來。」
但你好似中文字都不懂看喎，點跟着歌詞唱K呢？「係o架，靠聽多背熟咋，所以咪成日唱到甩晒Key、甩晒嘴、甩晒歌詞囉，就算登台時台前有歌詞Mon給我看，都冇用；若幸運，歌詞頭兩句係『一』或『大』之類簡單字，又有顏色High Light到，都跟到去既。」Neway現在獨市，對你有冇影響？「冇乜影響喎。因為我多數上去屋企附近那幾間上樓K場幫襯，就算飲大咗，都易返屋企嘛。」