圓美「貓」王 M字額好Cute

模特兒︰Kinki（Kaleidoscope） 　場地提供︰阿貓地攤

經常出外參賽的Dylan，完全不怕陌生人。	拍攝完畢，疲倦的Dylan忍不住瞓低，但靚貓本色維持不變。	毛髮唔梳理一下，又點會靚呢？

王者基因

「喵……我叫Dylan，屬異國短毛貓，3個月大已被主人睇中，悉心培養成未來貓王。據主人解釋，異國短毛貓嘅審美標準同波斯貓好相似，頭要圓、身要短，仲要耳細、鼻高、眼大大。要成為Show Cat，性格一樣重要，最好係唔怕人、唔攻擊人，若經常表現得好緊張亦唔太適合，由於性格有遺傳，所以呢方面可以從貓咪嘅父母甚至曾祖父母身上了解。能夠被主人認定係靚貓，真係好開心，喵！」

Dylan的主人Francis透露，培養Show Cat的秘訣是勤洗澡、多玩耍。	Dylan平日最喜歡玩羽毛棒，每次都玩到眼定定，十分搞笑。	放大圖片

正如主人Francis所講，Dylan除了天生麗質，仲好乖巧兼好好脾氣。採訪當天，拍照時間長達半小時，牠竟能全程坐定定，任影唔嬲，即使小記嘗試把道具強加其身上，亦乖乖就範，怪不得第二次出賽，已獲封貓王。

魚油餵大

「其實主人喺2002年先開始養貓，當時都係受友人嘅薰陶，後來愈養愈着迷，仲發展成興趣，以培養Show Cat為樂，專程從外國選購優良品種加以繁殖，至今已養過30多隻貓，早排更開設寵物店呢！講到養Show Cat嘅秘訣，我梗知道喇！除咗進食魚油，令毛髮變得濃密有光澤，亦要食吓維他命補充劑。至於零食，當然可免則免啦！此外，要擁有一身漂亮嘅毛髮，除了要經常沖涼、梳理，仲要避免被太陽暴曬，否則毛色好易變差。講多個秘訣畀大家知，主人每日都會抽時間陪我玩，仲會有至少半個鐘頭時間，畀我習慣接觸人，去到比賽現場就唔怕見到陌生人喇。」

胞妹作伴

剛才提到Francis養了幾十隻貓，貓咪之間打起架來，好易弄傷毛髮，點樣可以避免？「主人都安排得幾周到，屋內所有Show Cat係唔會與家貓『同居』，而我早就被分發到一所獨立房間居住，主人話，每次我出外參賽，都會接觸外界貓隻，因此有機會沾染細菌，所以平日唔可以跟一般貓咪玩，但若是同胎生的貓咪就冇所謂，家陣我就同孖生妹妹住埋一齊，所以都唔覺寂寞。」據Francis表示，有其兄必有其妹，Dylan的妹妹有一身優良遺傳，以往也曾在貓展中屢獲佳績呢！

成王之路

Dylan早前參加超級冠軍貓展，跟300隻候選靚貓角逐冠軍寶座，評判們分別從幼貓組及絕育貓組中挑選出共24隻靚貓，再嚴選最優質的貓咪成為超級冠軍貓王。評判會撫摸貓頭、眼睛及貓毛，分析健康狀況，又用玩具測試其反應，最終Dylan憑着圓潤頭形、細小的鼻子及漂亮的下巴，獲得一致好評，脫穎而出成為貓王。