熊黛林（Lynn）前晚出席其模特兒公司Style舉行的春茗，公司旗下不少模特兒均有出席，現忙於拍攝《我的野蠻女友2》的Lynn，表示三月初將到韓國拍攝，屆時會在當地逗留多幾日。問到會否怕被指到當地整容，她笑着說：「一定唔會，我去之前影定張相，返嚟之後又影相，到時睇吓有無分別。」Lynn表示在戲中沒有親熱戲，問她幾時獻出初吻？她說：「冇導演要求。（留畀郭富城？）我冇特別留住，亦冇特別需要留。」而情人節未能與城城度過，兩人會否相約過元宵？她說：「我會約幾個朋友食飯，唔會一個人過咁孤單。」而城城是否其中一個，她則笑而不答。

另外，Lynn被問到日前在活動上與李玟撞衫會否尷尬，她表示一點也不介意，反而介意自己是否着得件衫靚，她說：「我好鍾意李玟的歌，佢着嗰件衫都好靚，好性感又有品味。」