被喻為新一代型男的羅拔柏迪臣，不再做萬人迷的吸血仔，於新片《驚動了愛情》一改戲路，飾演一名隱蔽青年，他接受訪問時直認自己與角色相似，愛收埋自己，更自覺在街頭開工似做馬騮戲！

記：記者

羅：羅拔柏迪臣

記：可以講下你戲入面個角色嗎？

羅：Tyler（角色名字）係個幸運嘅人，仲有選擇餘地，亦因為咁而感到掙扎同矛盾。

記：你點解會被角色吸引？

羅：因為我都係個幸運嘅人，感謝主！而且我都有掙扎同矛盾嘅時候。

記：覺得自己似Tyler嗎？

羅：都似o架！成日都收埋自己！

高招化解

記：每次拍街景戲份都有大班人駐足觀看，會否影響表現？

羅：真係好滑稽嘅經驗，當你努力投入角色嘅時候，一睇到佢哋，就好似提醒你「你唔係個角色」。或者正如拍檔Emilie de Ravin話齋「好似做緊馬騮戲咁」。

記：去到邊都有人影你相，煩嗎？

羅：Twitter（社交網）真係好勁，大家都知道其他人動向，不過我試過有幾次同皮雅斯布士南出街，所有人一望就認得出佢，喺餐廳入面有人(目及)實我哋，皮雅斯就行過去同佢哋打招呼兼自我介紹，呢招好掂，搞到對方冇晒癮。

記：咁你有冇學吓嘢？

羅：我？我會即刻匿入枱底囉。

冷卻熱情

記：你鍾意逃避？

羅：當我大概十七到廿歲時真有無比自信，好了解自己，知道想要啲乜，事事都自己做決定，有晒控制，不過，十零廿歲嘅思想有幾成熟？之後發現自己所謂「控制」其實都係不實際，我根本就冇進步過，所以依家都放棄喇！我最後發現自己連小小嘅決定都做唔到，喺得到名利同時，我就失去自由活動嘅能力，我收埋自己喺挫敗之中。我幾乎記唔起過去兩年嘅事，真係好瘋狂同古怪！

記：就好似去年康城電影節，一對夫婦用六萬美金要你錫佢哋個女一啖！

羅：我覺得好搞笑，如果我被影到，當時一定係歇斯底里咁笑，我心諗「有冇搞錯？去搵Zac Efron啦！佢比我出名好多」。

記：聽聞你曾經想做為政客寫講詞嘅撰稿員？

羅：係呀！都幾令人着迷，短短三兩分鐘要去說服其他人，將訊息傳開甚至有回響，其實我初時好享受《吸血新世紀》嘅宣傳工作，因為都幾相似，不過漸漸失去呢份熱情，因為我覺得有「責任」去吸引人。

床戰停不了

羅拔柏迪臣片約一部接一部，拍攝完《吸血新世紀3》及《驚動了愛情》之後，羅拔又要為新片《Bel-Ami》在倫敦及匈牙利進行拍攝工作。影片故事背景為1890年的巴黎，他飾演一名為了向上爬而向富婆出賣肉體的年輕人Georges Duroy。除羅拔之外，奧瑪花曼、姬絲汀史葛湯馬士及姬絲天娜麗芝亦有份主演。

將在片中有激情戲的羅拔日前受訪時坦承與奧瑪在片中的床戲感厭惡，而根據劇本，羅拔還要與姬絲天娜及姬絲汀有性愛場面。而據知該片的其中一名投資者正是《一夜成名》創辦人及前辣妹經理人Simon Fuller。

文：外娛組