對比上一集《Biohazard: The Umbrella Chronicles》，今集《The Darkside Chronicles》確實進步了好多，尤其係玩法同設定，都有向《Biohazard 5》借鏡，而且仲可以為角色儲新衫；今集更會透過角色之間的遭遇同回憶，交代角色的陰暗面，聽落都真係幾吸引！

撰文：布偉倫

重溫經典場面

《Chronicles》以過往經典系列作的場景重新包裝推出，好似今次Chronicles模式三大場景中，「Memory of a Lost City」來自《Biohazard 2》，而「Game of Oblivion」就來自《Biohazard Code Veronica》；不過遊戲開發小組並唔係毫無誠意，新加入以2002年南美為背景的任務「Operation Javier」，驟眼睇幾似《Biohazard 5》的非洲場景，對比其他兩個場景都係昏暗戰場，日光日白打喪屍確有另一番風味。最好玩當然係用Wiimote當手槍打喪屍，畀喪屍埋身時就要狂搖Wiimote甩身。

雙人出戰互相照應

今集同《Biohazard 5》幾相似，好着重二人合作，例如上文提及的三個場景都要雙人拍檔，Leon同Claire會在「Memory of a Lost City」中出場，而他們亦會各自搭上另外拍檔執行任務。雙人合作時除了要照顧自己安全之外，亦要理埋同伴的生死，當拍檔被喪屍圍剿致死時，都一樣會Game Over，所以危急時候就要為同伴補血。上集有一壞處是一執到藥草就會自動使用，就算只係受少少傷都會用晒成條藥草，而今集要你用道具先會補血，更加物盡其用。

改裝武器

今集加入唔少有趣玩法，好似部分場景要根據畫面指示按下唔同按鈕組合，遲咗可能會Game Over。另外，玩家仲可以自行改裝武器，砌啱先至開火；而線上排行榜就可以將戰績上載同其他玩家比一比。《Biohazard The Darkside Chronicles》更加入會令玩家一玩再玩的功能，就係可為主角換衫，但要爆機後先得到新衫，想扮靚就要打多幾次。喪屍同變種生物，在外形上都做得幾駭人，以Wii機能來講已算幾有水準；至於點樣從故事內容中搵到角色間的陰暗面，就要靠大家自己努力嘞。

類 型：驚慄、射擊

開 發：Cavia/Capcom

平 台：Wii

推出日期：已推出

售 價：$488（普通版）$568（豪華版）

查詢電話：2359 7998