細個睇《灰姑娘》以為後母兩個衰女為王子才爭玻璃鞋，但人大了，始發覺她們其實不能自控，因為透明事物都有一種不能言喻的誘惑。正如小記今次面對性感尤物舒淇，雙眼本應注視其葫蘆身形，但最後竟不自覺轉向她手持的SE Xperia Pureness，歸根究柢，都是全球首個透明芒所累！

前衞浮雕介面

透明手機並非新鮮事，要有話題性，SE一於向上發展，將傳統的彩色屏幕，變成一個只有64級黑白兩色的1.8吋細芒。唔用嗰陣，屏幕不透光冇咩特別，但開機後卻不得了，屏幕變成全透明！最過癮是鍵盤白燈這時才緩緩亮起，由冇變有簡直Eye Catching到裂！介面方面，所有圖示由白色背光燈組成，近看如浮雕一樣，又是另一前衞設計。

限售888部	音控放在兩側，左邊校細聲，右邊則校大聲。	內置鋰電冇得拆蓋換電，好處是SIM卡槽需放在機側，毋須關機即可更換。

設計化繁為簡

原以為透芒下所有零組件均會無所遁形，但廠商將它們全「塞」進機身下半部分，加上電池、記憶卡及天線都經過微縮處理，望落機身簡潔非常。而為避免刮花後凸顯瑕疵，屏幕兩面都鋪上硬塗層，將硬物對其損傷減至最輕。話分兩頭，屏幕透明後對使用造成不少困擾，例如強光下圖示會變得相當模糊，手持過後又會印上大量指紋，除非閣下天生眼利又經常抹拭屏幕，否則買之前要想清楚。

鍵盤使用時才會透光，其餘時間就會熄滅，神秘得來又慳電。	待機畫面是個立體時鐘，在黑暗中連時分秒針都睇到。	支援3.5G，可經NetFront瀏覽器上網，但屏幕太細網頁唔清楚，實質作用不大。

冇鏡頭照收貨

透芒固然前衞，但冇內涵便是花瓶一個。Pureness雖然冇拍攝鏡頭，但基本功能不弱，既支援GSM四頻及HSDPA，還有齊播歌程式、TrackID選曲、FM收音機及MS Exchange推郵等功能，而且內置記憶容量高達2GB，就算冇得換卡都有排用！Pureness另一賣點是矜貴，香港是全球第二個發售點（第一個是巴黎），首批僅售888部，買嚟晒命就至啱！而且更專享環球換貨服務，即使手機在外國停止運作，廠商都會在48小時內免費幫你替換手機，有這種VIP待遇，即使賣$6,888都係抵！

得一款《食鬼》遊戲，唔襟玩，但勝在經典。

跟機送藍芽立體聲耳筒HBH-IS800。

規格表

制式︰GSM四頻、UMTS 2100MHz

體積︰102×43×13mm

重量︰70g

屏幕︰1.8吋64級黑白透明TFT、240×320解像度

記憶體︰內置88MB＋2GB

對外連接︰藍芽2.0、USB 2.0、7.2Mbps HSDPA

通話時間︰450分鐘（2G）、210分鐘（3G）

備用時間︰350小時

撰文︰陳志滔　攝影︰陳富權

查詢電話︰8203 8863