唔止做人，連數碼相架也要升呢。Panasonic就將iPod喇叭、CD機連FM/AM收音機加入全新數碼相架MW-10之上，買一得四又有邊個用家覺得唔着數？唯一唔着係只顯示到英文歌名！

竹製揚聲器音效佳

正面睇MW-10並唔覺機身同時係一個iPod喇叭，原來用以安置iPod或iPhone的Docking設在機背位置，由於播放時iPod屏幕都會擋在機背之後，所以唔可以直接用手指在iPod上揀歌，一定要用跟機遙控器。如前所講，MW-10暫時顯示唔到中文字或日文字，揀歌有難度，好彩勝在機身加上竹製單元揚聲器，音效表現唔錯；而且設於音箱單元的擴散器更有效將聲音擴散到更大範圍，離遠聽都一樣好聲。另外，連iPod內的影片都播到，在9吋WVGA解像度LCD上顯示效果都幾好。

放大圖片	拉開顯示屏就能發現內置的CD碟盤。	MW-10支援相片放大功能，想睇清楚相片Detail都唔難。

聽齊iPod、CD、收音機

之前講過，MW-10可以播放音樂CD亦能接收FM/AM頻道，但係搵勻成部機都唔見有天線同CD盤？原來CD盤藏在顯示屏與背部之間，要推開機頂活門先可以放碟，播到音樂CD之餘，亦能夠播放燒錄在CD-R內的JPEG相片，而天線則以外置式駁在機側。講到最方便，都係直接插卡睇相，MW-10理所當然內置SD卡槽，如果想將數碼相片儲在機內慢慢睇都好容易，因為機身內置4GB記憶體，可以儲到幾千張相！

竹製單元喇叭設在機前，輸出率雖唔算高，但幾好聲。	支援雙畫面顯示，可一邊顯示歌曲清單，一邊顯示日期、時間。	設有4種主題Template，可按自己喜好揀選。

雙畫面顯示任配搭

數碼相架一向都會在顯示模式搞花臣，MW-10今次都有新嘢玩。MW-10內置Template唔算多，只有4款，不過每個主題都有唔同變化，例如淨顯示相片或時鐘，亦可用雙畫面顯示，如自由組合月曆、相片、時鐘同歌曲清單等，想點玩就點玩。嫌相片唔夠靚？MW-10內置簡單執相功能，既可旋轉相片，亦能夠因應情況而調節相片光暗度；嫌睇相唔清楚，機內設置相片放大功能，靚相Detail位一眼睇晒！

可以自行調校相片的光暗度及顯示模式，想鮮艷些可揀Dynamic。	iPod Dock設於機背位置，相當隱蔽，惟機身無可避免地變得肥仔！	全部操作都可靠遙控代勞。

規格表

顯示屏：9吋

內置記憶體：4GB

支援播放媒體：CD、SD卡、iPod

總輸出：10W

體積：252×202×150mm

重量：1.9kg

撰文：布偉倫

攝影：黎劍華（產品）、陳世昌（人物）

模特兒：Sarah（Angel Cast）

查詢電話：2833 0955