中國模特兒在國際時裝舞台上大放異彩，更升呢為國際名模，繼杜鵑與裴蓓後，新進模特兒張靜（Crystal）鋒芒初露，先後踏足米蘭與巴黎時裝舞台，挾熊黛林（Lynn）師妹之名正式攻港。
張靜昨日應THE SWANK之邀請來港拍攝2010春夏廣告，先後穿上John Galliano與Collette Dinnigan 2010春夏新裝與國際男模Sharif Webb進行拍攝。該廣告以白老虎為主題，找來曾為莎朗史東等擔任形象指導的國際名造型師Paris Libby任廣告創作總監、名攝影師Olaf Mueller操刀拍攝，陣容強勁。
安逸就會進步慢
Crystal已多次來港，今次會逗留較久，日前更與媽咪去shopping，狂掃名牌，買到超重。Crystal承認此行來港有意探路發展，之前她一直留在歐洲及新加坡，問她最鍾意哪個城市？Crystal說：「我最鍾意係米蘭，當地生活安逸，但太過安逸就會進步慢。（同上海有乜唔同？）上海生活節奏快，工作完就返屋企，但巴黎就中午十二點食晏，之後飲咖啡到兩點半，每個人都好享受生活！」
由於Crystal是典型的北方女仔，性格爽朗，故此很多男性朋友都說她性格很男人，不過她自覺最大賣點是夠國際化，然則她的性格是否適合做model？Crystal說：「有時我太冇自信，係攝影師同化妝師畀自信我。」
唔怕同師姐比較
與Lynn同屬STYLE模特兒公司旗下，身為師妹的Crystal大讚Lynn外形好看、性格亦很好：「我哋之前喺上海都係同一間公司，大家都會一齊食飯同唱歌。（會唔會同Lynn敍舊？）佢太忙，我亦好忙，每日都casting同影相。（驚唔驚外間將你兩個比較？）唔驚，我哋外形同路線都唔同。（知唔知Lynn同郭富城拍拖？）我喺網上睇到報道先知，未有問佢。」Lynn已由天橋跳上大銀幕，Crystal一樣有興趣拍戲，去年更與方中信合拍《時尚先生》，方中信還指她身材超高。而她最想合作的男演員是已逝世的張國榮同已貴為國際巨星的金城武：「所以我諗都冇可能，只係幻想吧！」
Profile
姓名：張靜（Crystal）
年齡：27歲
籍貫：上海
三圍：33-24-36
身高：178cm
文：名人組